Bangladesh-in Hasina-i party, Awami League ban

Bangladesh-in Hasina-i party, Awami League ban
Bangladesh-a sorkar lailawk, Chief Advisor Muhammad Yunus-a kaihhruai chuan Inrinni khan prime minister an paih thlak tak, Sheikh Hasina-i kaihhruai party, Awami League chu an khap (ban).
Yunus-a kaihhruai sorkar hian Awami League hi anti-terrorism law hmanga an ban thu puangin, “Official gazette notification pawh hna thawh leh ni hmasa berah tihchhuah a ni ang,” an ti.
Council of advisers (cabinet) chuan ban hi ‘Bangladesh-a International Crimes Tribunal-in ram himna leh a chanvo kaihhnawih thila Awami League leh an hruaitute chungthu a rel fel hma chu kalpui a ni dawn’ tih an sawi.
July, 2024-a Hasina-i kaihhruai sorkar paih thlak bul tanna lungawi lohna lantirna hruaitu leh telte himna atan ban hi a tum bawk tih an sawi a. Lungawi loh lantirnaah hian Hasina-i duh lohna lian taka kalpui niin a sorkar chuan heng mi, a tam ber zirlaite hi tharumin an bei let a. Boruak sosang zelah kum 77 mi hian a nihna kalsanin Dhaka a chhuahsan a, India-ah a tlanchhe zui ta a ni.
Yunus-a kaihhruaia sorkar hotu liante thutkhawma hian Hasina-i party an ban bakah hian ICT dan ennawnin tribunal hi eng political party pawh, an front organisation leh anmahni hnuaia body-te chungthu ngaihtuah thei turin an ti a ni.
Ei rukna thubuai bakah Hasina-i hi a hlawma mi thah leh mihringte laka tih dan tur phung lo taka chea pawi khawih leh mi dah that thubuai a nei a. Hengte hi Bangladesh-a ICT-ah ziah luh a ni.
Thla hmasa khan Bangladesh-a court chuan Hasina-i leh a laizawn, Sheikh Rehana, British MP Tulip Rizwana Siddiq leh mi dang 50 chu politics-a an thiltihtheihna remchanga hmanga dan lova ram neia puhna avangin manna tur thupek a lo chhuah tawh.
Zirlai kaihhruai National Citizen Party (NCP) chuan Hasina-i hi ro a rel laia ‘thil a tihdik lohte’ avangin a chungthu rel an phut bawk a. Party thar hian Awami League chu inthlanpuiah pawh ding lo se an duh bawk.