Barca chak chang chang

Spanish La Liga title race-a Real Madrid hmahruaina han ter pha teuh ber Barcelona chuan Inrinni zanah second half tir lama Raphinha goal khat tihluh hmangin mikhual Las Palmas lakah 1-0 hnehna an sualchhuak hram a; hmahruaitu Real nena an inthlauhna chu point ngaah kham hniamin, nizan result tarlan hman lohah Bernabeu club-in an mikhual Athletic Bilbao an hneh chuan point riata an kal falna an luahkir leh ang.
Joao Felix siamsak hmanga minute 59-a goal awmchhun khungtu Raphinha khan season kal laiah La Liga goal nga thun tling chiahin, kumin February ni 24-a Getafe laka a tihluh hnua a league goal hmasa leh ber a ni.
|an atanga minute 26-na lekah Las Palmas keeper Alvaro Valles hnawhchhuah a ni a, kha khan mikhual tan a tiphet ta a ni.
Valles hi tun season La Liga lama goalkeeper chetha leh rintlak berte zinga pakhat a ni mek a, mahse, Inrinni zan kha chuan at a so tlat pek a, a area atanga tlanchhuakin lakah a chesual a, a pawlte tan hna a tihautak zo ta a ni.
Top flight-a an kirleh hnuah Las Palmas kha table-ah 12-na an luah pha a, relegation atangin an dinhmun a him viau rih.
Barcelona pawhin a tam zawk nihna an chhawr nghal mai zo bik lo a, substitute Joao Felix an thawnluh hnuah mikhual tlarhnung a chhaihbuai zing hle.
He Portuguese attacker hian a luh phat atangin huhang lian tak a nei nghal a, Leeds winger hlui Raphinha tan ball tha zet chhawpsakin, Brazil international hian mualneitu team chakna goal awmchhun a tahlut a; assist a neih hnuah Felix chuan hnai set sawt atanga goal thun theihna hun remchang nei zui bawk mah se goal kham a tihper.
Hun tawp dawnah Catalan giants an chesual teuh hle a, Alberto Moleiro chuan Las Palmas tan draw result a hlawhchhuak teuh hle a, net sir a fuh hlauh.
Nizan result tarlan hman lohah Carlo Ancelotti team Real Madrid an chak chuan Barcelona kut atanga Spanish title lakkir lehna chance sang zawk an nei zui leh ang.
April ni 21 khian title inchuh team pahnih Barca leh Real hi Bernabeu-ah an intawng dawn a, inkhel ngaihven hlawh a ni ang.