Barca in hma an hruai chhunzawm

Inrinni zan khan Spanish La Liga khelh chhunzawm a ni a, FC Barcelona chuan si hnih faia Las Palmas hnehin table-ah hma an hruai chhunzawm. Barca rual hian Atletico Madrid pawhin hnehna an chang ve bawk.
Hmahruaitu FC Barcelona hi Las Palmas hmachhawn turin Estadio Gran Canaria-ah an leng lut a, mikhual an nihna hmunah khel tha mah se goal an thun har hle thung. Dar kar khat chuan zet goal lut a awm theih loh hnuin Dani Olmo chuan minute 62-naah Barcelona hmahruaina goal a thun. Olmo hian Barca tan November thla hnu lamah goal a thun lo vang vang a, inrinni zan an khingpui Palmas lakah goal a thun ve leh ta nawlh a ni.
Dani Olmo goal thun hnuin inkhel a hmuhnawm leh zual a, mualneitu Palmas in tlawm pumpelh ngei tumin tan an khawh nasa hle. Table chung ber luah chhunzawm tura chak mamawh Barca in goal thun belh tumin tan an khawh ve bawk a, hun tawp dawnah an che fuh nawn leh. Hun pangngai tawp hnu, hun pek belh minute 90+5-ah Barca tan hian Ferran Torres chuan an goal hnihna thunin an chakna a nemnghet a, point thum hlu tak an hmu zui ta a ni.
Inrinni zana inkhel dangah Atletico Madrid chuan mikhual an nihna hmun Mestalla-ah mualneitu Valencia chu 3-0 in an sawp. Atletico Madrid tan hian Julián Álvarez chuan goal hnih a thun a, Ángel Correa chuan goal khat a thun ve bawk. Manchester City atanga Atletico Madrid zawm ta Julian Alvarez hi a club thar tan a chetha chho viau a, season kal mekah goal 19 a thun tling der tawh. Atletico Madrid tan goal 19 a thun hi season liam ta, season tluana Manchester City tan a goal thun zat a ni der tawh.
Inrinni zanah table chung lama awm pahnih Barcelona leh Atletico Madrid ten hnehna an chan vangin champion tuma inum boruak a ngaihnawm chhunzawm zel. La Liga-ah hian khelh 25 atanga point 54 hmuin Barcelona in hma an hruai a, an hnuai chiaha awm Atletico Madrid in point 53 an hmu mek a. Pathianni zana inkhel hmachhawn Real Madrid in point 51 an hmu mek bawk. Pathianni zanah Real Madrid in hnehna an chang a nih chuan Barcelona nen an point hmuh a inzat leh chiah dawn a. An point hmuh zat intluk bawk mah se Catalan club lian Barcelona in hma an hruai chhunzawm tho thung ang.