Barca leh PSG in semi-final an lut

April 15, Thawhleh zan khan UEFA Champions League (UCL) quarter-final thawh hnihna khelh a ni a. An khingpuite laka tlawm chungin FC Barcelona leh Paris St-Germain ten semi-final an lut.
Dortmund 3-1 Barca
An mualah 4-0 ngawta hnehna chang tawh FC Barcelona chu German club lian Borussia Dortmund hmachhawn turin Signal Iduna Park-ah an lenglut. An len luhna mualah Catalan club hian hian an khel chhe viau a, hnai takah Dortmund khel an en a ni ber. Mikhual an nihna hmunah goal thum an chhuah a, own goal hmangin goal khat an thun ve hram bawk.
An mualah hnehna chang a, inlehthalna lian thlen tir ngei tuma tan khawh Borussia Dortmund in bul an tan tha viau a, goal pawh an thun hma hle. Inkhel tan atanga minute 11-na lekah Barcelona si nghak Wojciech Szczesny chuan penalty a chawi nghal. He penalty hi Serhou Guirassy chuan inringtawk zet, Panenka ngei maiin a pet goal a, hmahruaina goal a thun. Hma takah goal an thun vangin an phur viau a, inlehthalna lian thlentir theih beiseina an nei sang leh zual sauh bawk.
Phur taka inlan Dortmund hian goal thun belh theihna hun tha nei bawk mah se chawlhlawk hmain goal dang an thun belh thei tawh lova, 1-0 a hmahruai chungin chawlhlawk an hmang. Chawlhlawk hma hian mikhual team Barcelona hmuh tur an awm mek lova, hlauhawm an siam thei lo.
Chawlhlawk hnu lamah Dortmund an khel tha leh zual. Second half tan atanga minute lina lekah corner atanga ball kal chu Serhou Guirassy chuan chiang zetin a tauh goal a, an goal hnihna a thun zui leh nghal.
Si hnih an phurh hnuin Barcelona an harh chiang leh zual a, goal thun an mamawhzia an hrechiang leh zual bawk. Barca hian fuh takin an khingpuite an nawr tlang a. Minute 54-naah Dortmund defender Ramy Bensebaini chuan an lamah goal a thun palh hlauh a, he goal hian Barcelona a fuih phur a, an inkar a tizau leh zual bawk.
Goal an chhuah hnuin Dortmund an khel tha zui viau a, goal khat an thun belh leh. Goal hnih thun tawh Serhou Guirassy chuan minute 76-naah Barcelona defender petchhuah theih loh vangin hun tha a nei a. Hnaite atangin chiang zetin a pet goal zui leh a, a hattrick siam hmangin Barcelona nen an inkar an tizau nawn leh. Serhou Guirassy hattrick siam hnu hian goal dang a luh belh tawh lova, Dortmund chuan an mikhual FC Barcelona chu 3-1 in an lo hneh.
An mualah 3-1 in hnehna chang mah se si belhkhawmah Barcelona in 5-3 in hnehna an chang a, semi-final lut zawk chu FC Barcelona an ni ta a. Barca hian season ruk chhung ngawt UCL semi-final an luh phak loh hnuin semi-final an lut ve leh ta nawlh a, champion ngei tumin tan an khawh zui ang.
Aston Villa 3-1 PSG
Quarter-final thawhkhatnaah 3-1 tlawm tawh Aston Villa hian PSG lehthal ngei tumin Villa Park-ah tan an khawh. Semi-final lut thei turin chak mamawh viau mah se bul an tan tha lova an mualah goal hnih an chhuah hmasa. PSG hian minute 27 chhung lekin Achraf Hakimi leh Nuno Mendes te goal thun hmangin si hnihin hma an hruai nghal.
An mikhual lakah si hnih phur thuai mah se Villa an insiamtha a, Youri Tielemans, John McGinn leh Ezri Konsa te goal thun hmangin hnehna an chang let a. Liverpool lo hnawtchhuak tawhtu PSG lakah 3-1 in hnehna an chang. An mualah chak bawk mah se Villa hian si belhkhawmah hnehna an chang zo lova, PSG hian 5-4 a hnehna changin semi-final an lut ta a ni.