Bawhchhiatna karah India leh Pak-in inkahhai a taka kalpui tum

Bawhchhiatna karah India leh Pak-in inkahhai a taka kalpui tum
India leh Pakistan ramte chu inkahhai an puan hnu lawk atanga ‘bawhchhiaa an inpuh tawn’ hnuah Pathianni zan khan nghet zawka kalpui turin remna siam leh beisei a ni.
He chanchin ziah lai hian a taka inkahhai kalpui tur hian eng ang kawnga hma lak zui tur nge tih erawh hriat a ni lo.
Inthenawm ram hnihte hi kum tam tak hnua an inbeih nasat ber a thlen hnuah US-in palai hna a thawh hnuah ramria inkahna hi tlemin a ziaawm.
US President Donald Trump-a chuan India leh Pakistan hruaituten inkahhai an pawm chu lawmawm a tih thu Pathianni tuk khan a sawi a, chuti a nih loh chuan mi maktaduai tel an thi thei dawn niin a sawi.
Inrinni tlaia inkahhai puan a nih hnu lawkah khan Indian-awp Kashmir-ah chuan thil puak ring tak tak hriat tur a awm zui nghal a, lehlam lehlam hian bawhchhiaah an inpuh.
India-in drone, missile leh laipui hmangin Pakistan leh Pakistan awp Kashmir chu thla hmasaa Pahalgam-a helho chetna thleng phuba lak nan a kap a, Pakistan chuan he thilah hian inrawlhna an nei lo tih a sawi thung.
US President Donald Trump-a chuan Inrinni khan a Truth Social Platform-ah inkahhai chu ‘tunah a zavaiin’ puan a ni tih a tar lang a. US palai hna thawhna a nih thu a sawi bawk.
Pakistan-a foreign minister pawhin a hnuah ram pahnih hian inkahhai inremna an neih thu a puang zui a, ‘ram thahnem takin’ palai hna an thawk tih a sawi.
Mahse, a hnu reilo teah mi cheng leh chanchinbumiten chuan Indian awp Kashmiri khawpui lian, Srinagar leh Jammu-ah thil puak ring tak leh vana thil thlawp an hmu zui nghal.
Indian Foreign Secretary Misri chuan Pakistan-in inremna ‘a bawhchhiat thu’ a puang a an ram sipaite pawhin ‘a tul ang zelin an chhang let’ tih a sawi.
Hetih lai hian Pakistan-a Ministry of Foreign Affairs chuan Pakistan chu inremnaah an ding reng a, ‘India-in hmun thenkhatah an bawhchhia’ tih a sawi a, sipaite chu ‘inbengdaih a ngai’ tih a sawi.
Kashmir hi India leh Pakistan-in an rama an chhal ve ve a ni a; mahse, UK-in kum 1947-a an ram a then hnuah tlem ve ve chauh an awp.
Nuclear ralthuam nei ram pahnih hian an inchuh reng a, vawi hnih an indo phah tawh.
India-a External Affairs Minister S Jaishankar chuan inkahhai puan a nih thu hi a puang ve a, ram pahnihte hi ‘inkah leh sipai chetna titawp turin an thawkho’ tih a sawi.
“India hi firfiaka chetna chi hrang hrang do kawngah a dinna a la ngai reng a, a dinna hi a kalpui zel bawk ang,” a ti.
Pakistan Prime Minister Shehbaz Sharif pawhin ram mipui hnena thuchah a sawiah inkahhai hi ‘mi tin tana tha turin’ an puang tih a sawi.
US Secretary of State Marco Rubio-a pawhin India leh Pakistan chuan ram dangah an buaina neihte ching fel tura inbiak an rem ti tih a puang ve bawk.
Amah leh US Vice-President JD Vance-a nen darkar 48 liam ta chhung khan Indian leh Pakistani hotu lawkte an dawr char char a, heng zingah hian prime minister ve ve, Narendra Modi leh Sharif te pawh an tel.
Pathianni khan Truth Social-ah Trump-a chuan India leh Pakistan hruaituten ‘an inep mekna chu tihtawp hun a ni tih’ an hre thiam ve ve chu lawmawm a tih thu a sawi.
“Hetianga chhinchhiahtlak thutlukna siam tura a puitua USA a tel hi a chhuanawm hle bawk a ni,” a ti.
UN Secretary General Antonio Guterres-a pawhin ‘buaina hmeh mih nana inbengdaih a ni chu’ a lawmawm tak zet tih a sawi bawk.
UK Prime Minister Sir Keir Starmer-a pawhin UK chu inbiakna atan a thawk tih puangin Foreign Secretary David Lammy-a chuan lehlam lehlam hi a bia tih a sawi.
“Vawiina inkahhai puan a ni thei ta hi a lawmawm hle a ni,” a ti a. “Tuna pawimawh ta chu tihhlawhtlin leh rei tak a daih theihna tur kawng a ni,” tiin Sir Keir-a chuan a sawi bawk.
Tun tuma India leh Pakistan inkara inepna hi chawlhkar hnih kal taa khualzinte chawlh hmanna khua, Pahalgam-a mi 26 thahna thlen vang a ni.
April 22-a Indian awp Kashmir-a helho chetnaah hian Indian 25 leh Nepali pakhat thah an ni a, a beitute hian Hindu an thlang chhuak nia sawi a ni.
Indian defence ministry chuan Nilaini tuka Pakistan an beihna kha a hmaa Pahalgam thil thleng titute laka phuba an lak ngei tur thu an sawi hnua an tih a ni a. Pakistan chuan ‘buaina tipunluntu’ tiin a sawi.
Pakistan chuan India-in thlawhna hmanga Nilainia Pakistan leh Pakistan awp Kashmir a kahnaah khan mi 36 an thi niin an sawi a, India-a sipaite erawh chuan Pakistan-in laipui a kahah civil mi 21 vel an thi niin a sawi thung.
Zirtawpni zanah pawh khan inbeihna nasa tak a awm a, lehlam lehlam hian an airbase leh sipai hmunte inbitumsakah an inpuh tawn.