Bawlhhlawh khawn lirthei tlanna rate siamthat ngen

Aizawl khawpui chhunga bawlhhlawh khawn lirthei tlan thinte an tlan dan hlat zawnga rate siamtha tura ngenna in awmzia a neih loh vanagin Aizawl Municipal Corporation nawrna atan bawlhhlawh khawn lirtheiah flag dum zar a ni dawn a, hei hian awmzia neih loh chuan na zawka la nawr tum a ni.
Aizawl Garbage Truck Owners’ Association leh PPP Mode Welfare thuchhuah intawm chuan, bawlhhlawh paih lirthei hman man (rate) hi veng hlat dan ang zela bithliah turin Aizawl Municipal Corporation hotute hnenah 2019 October 25 leh a hnu lamah vawi 8 an thlen tawh a. 2024 September 6 thleng khan hmalakna lawmawm an la hmu lo tih an sawi.
AMC hnuaia bawlhhlawh paih lirthei hman man hi veng hlat dan nena chhutin per kilometre-ah a inang lo hle, tiin, 407 truck (MMV) rate per km-a chhuta tlan to ber Rs.132.06 a nih laiin, a tlem ber chu Rs.88.26 a ni a. Km 1 zelah Rs. 43.80 in a inthlau a. Pik up (LMV) rate per km-a chhuta tlan to ber Rs.100.83 a nih laiin, a tlem ber chu Rs.60.28 a ni a. Km 1-ah Rs.40.55 in a inthlau tih an sawi.
‘Aizawl khawpui chhung veng hrang hrang hlat dan azira per kilometre-a chhutin bawlhhlawh paih lirthei hman man a inang lo nuai a. Hemi siamtha tura thuneitute hnena vawi tam kan ngenna chuan awmzia a neih loh avangin, lungawilohna lantir nan 2024 September 9-13 thleng hian bawlhhlawh paih lirthei zawng zawngah flag dum tar a ni dawn,’ an ti.
AMC hotuten a rang thei anga hma lak sak a, Solid Waste Management Centre Tuirial leh Aizawl chhung veng tin hlat zawng azir zela bawlhhlawh paih lirthei hman man State Transport Authority pawmpui rate anga per km-a siamtha turin an phut tih an sawi a. Flag dum tar hian awmzia a neih lo chuan a hlawhtlin ngei theih nan hma lak zui zel an tum tih an sawi.