Bayern an chak nuamsa

Inrinni Holstein-Stadion inkhelah Harry Kane-a hat-trick siam hmangin mualneitu Holstein Kiel lakah Bayern Munich chuan 6-1 hnehna nuamsa an chang a, Bundesliga club 18 a hmachhawn tawhte lakah England captain hian goal a khung kim ta vek a ni.
Kaithar muala Munich goal hmasaber hi tan atanga second 13-na leka lut niin, Kane siamsak atanga Jamal Musiala goal hmahruai thun hi German top flight-in Bundesliga tih hming a put hnua Bayern goal lut rang ber dawttu pakhat zawk a ni chho.
Bayern tana Bundesliga goal thun rangber chu striker Giovane Elber niin, kum 1998 daih tawh khan he Brazilian hian tan atanga second 11-naah Hamburg lakah Bavariabns hmahruaina goal a thun.
Harry Kane chuan first half-ah goal hnih thunin, second half tawp dawn hun pekbelhah penalty atangin a goal thumna a khung leh a,a club vawn lai tan tum nga zet hat-trick a siam tling ta!
Bayern Munich goal hnih dang hi first half-a Nicolai Remberg ‘own goal’ leh Crystal Palace forward hlui Michael Olise-te tihluh a ni.
Holstein Kiel goal neihchhun hi second half minute 82-a Armin Gigovic-a thun niin, he goal hi home fans tana goal lawm tur awmchhun niin, league home match-a an goal hmasaber a ni nghal bawk.
Vincent Kompany team Bayern hi season thara an league game khelh pathumah an la chak fai vek a; Bundesliga kawtkaia an season hmasaberah Kiel hian point an la thawkchhuak zo lo thung.
Harry Kane khan Bayern a zawm hnua bundesliga game 35 a khelh tawh atangin goal 40 a thun tling ta.
Inrinni inkhel dangah Bayer Leverkusen pawhin mualneitu Hoffenheim lakah 4-1 hnehna an sualchhuak ve bawk.
PreZero Arena-a mipui 30,150 pungkhawm hmaah RB Leipzig laka tlawm tawh Bundesliga champion Bayer Leverkusen chuan hnehna an lawm leh thei ta a; ti hian, Bundesliga away game bikah tum 19 zet tlawm an pumpelh tling chiah a, kum 2012 leh 2014 inkar chhunga match 33 chhung tehreng tlawm lo tling Bayern Munich dawta he division history-a away tlawm pumpelh rei ber an ni chho.
Xabi Alonso team Leverkusen hi German top flight-ah match 35 chhung zet tlawm lo ngar ngar kha an nih laiin thla hmasa mai August ni 31 zan khan BayArena lamah league-a an tlawm loh rei record kal lai an tawpsan a, Leipzig mualah hnehna boruak an hip zui leh ta a ni.