Bayern hmahruaina chhah belh

Bayern hmahruaina chhah belh
Freiburg muala 2-1 hnehna changin Bayern Munich chuan Inrinni khan Bundesliga table-ah point rukin hma an hruaifal ta.
Europa-Park Stadion inkhel minute 15-na leka mikhual hmahruaina goal khungtu England captain Harry Kane khan nikum November ni 22-a Augsburg laka hat-trick a siam hnu khan penalty tih loh khelh pangngai (open play) atangin goal a thun thei ta tlat lo a, mahse, chu harsatna chu Dier siamsak atanga sukiangin, half time-ah mikhual team-in sikhat faiin hma an hruai tlang.
Kum 31 mi Kane khan Bavarians tan belhkhawma match 70 a khelh tawh atangin goal 67 a thun tling ta a, tun kha season kal laia a goal 23-na a ni thung.
Second half tir lamah South Korea defender Kim Min-jae chuan Joshua Kimmich-a corner chhuih atangin sihnih faia Bayern hmahruaina goal a tauhlut a, a club vawn lai tana a goal li khungna ni tawhin, Freiburg goal neihchhun hi corner atang bawka substitute Matthias Ginter-a tauhluh a ni.
Vawi 32 tehreng German champion ni tawh Bayern Munich-in mi khelmuala point thum an hmuh lai hian defending champion Bayer Leverkusen chuan minute 85-ah an hmahruaina hlohin RB Leipzig lakah 2-2 draw an hlawhchhuak a, Bayern lakah ‘pressure’ na zawk pek an harsat ta rih a ni.