Bazarpui-a seat pek sa ennawn leh vek dawn

Aizawl Bazarpui-a thu thin hnena sawrkar hmasa huna allotment pek tawh chu ennawn a, a dik tawk loa nei an awm a nih chuan cancel thlenga hma lak nise tia rel a ni.

Commerce & Industries minister F Rodingliana hoin Thawhlehni khan department hotuten Aizawl Bazarpui tia hriat, Aizawl City Centre leh Aizawl City Centre Annexe sak mek dinhmun leh stall awm dan an thlirho.
Bazar building thiah hmaa seat nei, sawrkar hmasa in bazar building sak zawh a nih huna seat pek leh tura inremna a siampui mi 1300 chuang chungchang ngaihtuah niin, heng mite hi endik leh vek nise tia rel a ni. Sawrkar dan dinglai angin heng bazar seat hi midang kuta hlanchhawn emaw hralhchhawn khap tlat a ni a, a tira seat pek (original allotee) te ngeiin bazar seat hi an la luah em, tih uluk taka endik nise tih a ni. Voters ID leh original document hrang hrang hmanga uluk taka endik tur niin, allotment neitute pawh koha interview neihpui an ni ang.
Bazar building pahnih – Aizawl City Centre leh Aizawl City Centre Annexe sak mekah hian, tuna ruahman dan chuan dawr 1415 awm thei tura duan a ni a, sawrkar hmasa in bazar building sak zawh a nih huna seat pek leh tura inremna a lo siampui mi 1300 chuang an awm a ni.
Bazar seat hralh chhawn emaw inhlanchhawn emaw phal loh a ni a, hetianga ti man chhuah chu an allotment cancel nise, tih a ni. Dawr luah man ennawn bakah dawr luahtuten security deposit dah tir tawh tura rel a ni bawk.
Ei tur zawrhna sira hriselna atana tha lo heng – vaihlo, tuibur leh a dangte seat allotment chu a tul dan azira ennawn leh nise tiin rel a ni.