Bazarpui sak mek enfiah

Bazarpui sak mek enfiah
Commerce & Industries minister Dr R Lalthangliana chuan Inrinni zing khan New Market Aizawla building sak mek tlawhin hmalak tawh chin leh hmachhawp a enfiah a. Line department official, contractor leh sumdawng pawl a kawm bawk.
Minister chuan hrileng avanga harsatna leh inkhuahkhirhnaten kum hnih chhung hna a tih khaihlak phah avangin tum ang huna bazar sak hna zawhfel hman a nih loh thu sawiin, contractor-te chu hna tlo leh tha, ram leh hnam tana rotling sa zo thuai thei tura chak taka thawk turin a hrilh.
Bazar building sak hna thawktu contractor leh sumdawng pawl inzawmkhawm hruaitute kawmin, mamawh leh tul an thlente bawhzui dan tur a sawi a. Building sak mek avanga sumdawng leh mipuiin harsatna an tawhte sawipuiin a hmunah a enfiah a; chinfel dan turte a sawipui nghal a. New Market-a mipui kalna chep lutuk zauh theih dan pawh en a ni.
New Market Aizawlah hian bazar building sak mek hlawm hnih a awm a; Commerce & Industries department hnuaia cheng nuai 3641.59 senga sak mek, Aizawl City Centre Annexe leh Aizawl Smart City Project, UD&PA hnuaia cheng nuai 4159.03 senga sak mek, Aizawl City Centre a awm a. Aizawl City Centre hi Smart City Project hnuaia thawh a nih angin ruahman dan chuan June 2024 a zo hman tura beisei a ni a; City Centre Annexe hi January 2024 a zo hman tura beisei a ni.