Beihna chhangin Israel-in thlawhnain Gaza a bei thar

Beihna chhangin Israel-in thlawhnain Gaza a bei thar
Thla eng emaw zat chhunga Hamas-in rocket hmanga an beihna nasa ber an tawh chu Prime Minister Benjamin Netanyahu-a’n chhang let tura thu a pek angin Israel chuan thlawhna hmangin Gaza a bei thar leh.
Israeli sipaite chuan Pathiannia Gaza atanga rocket kah chhuah 10 zinga a zahve aia tam chu Israel chhungah a tla a, a bak chu an kap thla tih an sawi a. A puak keh themin a fuh avangin mi pakhatin hliam a tuar niin Israeli damdawi in chuan a sawi.
Netanyahu-a hian President Donald Trump-a nen inbe tura Washington a panna kawngah a sipaite chu ‘na taka chhang let’ turin a ti.
Hamas enkawl Gaza-a health ministry chuan Thawhtanni tukah khan a hma darkar 24 chhunga Israel beihna avangin Palestinian 56 vel an thi tih a puang.
Hamas Government Media Office leh Palestinian Journalists Syndicate (PJS) chuan Gaza chhim lam, Khan Younis-a tual chhung chanchinbute inkhuarna puan in kah fuhnaah Palestinian chanchinbumi thiin mi dang pakua an hliam niin a puang.
Reuters news agency chuan Nasser damdawi in hung chhunga awm puan in kang thelh tuma mi an che lai video a tichhuak bawk.
Israel Defense Forces (IDF) leh Shin Bet intelligence agency ten thuchhuah intawm an siamah chuan ‘Hamas firfiak, chanchinbumi anga a press company-a thawk thah a ni’ tih an sawi thung.
An mi thah hi Hassan Eslaih-a niin an sawi a, indona chhuah phahna, October 7, 2023-a Israel beihnaah pawh a phusa hle niin an sawi bawk.
PJS chuan ‘na takin an dem’ a. UN pawh Israel chu ‘chanchinbumi tela Palestinian mipui zawng zawng a bei’ titawp turin a ti.
Israel hian Hamas-te hi damdawi in chu inhum nan leh an ralthuam chhek nan an hmang niin a la puh reng a, lehlamin an pha thung.
A hmain IDF hian Israel hawiin rocket kah a nih thu leh Gaza lailia Deir al-Balah-a district eng emaw zata chengte chu insaseng turin a ti lawk.
IDF Arabic thupuangtu, Lt Col Avichay Adraee-a’n inralrinna a tihchhuahah Israel chuan ‘rocket kah chhuahna hmunte chu a bei dawn’ tih a sawi.
Hamas chuan rocket-te hi Israeli-ten ‘Gaza civil mite an suat’ chhan let nan an kap tih an sawi niin Reuters news agency chuan a puang.
Israel-a Ashkelon khawpuiah chuan Pathianni zan khan rocket-a kahna avangin siren ri leh flat hnuai lam puak ri hriat tur a awm.
Tun tuma rocket-a beihna hi indona awm tirha Hamas-in an kahna lakah chuan a tlem hle a, Israel hian an ralthuam tam tak an lo chhutchhiatsak tawh a; mahse, Israel hi a khât tawkin an la kap reng a, beih let theihna an la nei tih lantir an la tum reng.