Beihna vangin Gaza naupang 21,000 velin rualbanlo – UN

UN committee chuan Israel-in kum hnih dawn liam ta atanga a beih hnuah Gaza-ah naupang 21,000 vel rualbanlovin an awm phah tawh niin a sawi.
UN Committee on the Rights of Persons with Disabilities (CRPD) chuan Nilainia report an tihchhuahah naupang 40,500 chuangin ‘indona kaihhnawihah hliam an tuar’ nia sawiin heng zingah a zahve aia tam hian rual an ban loh phah tih an tar lang.
Gaza-ah hian naupang ei tur tha hmuh loh vanga nih tur ang ni lo an pung hle a, an ram pumah tam a tla tih puan a ni.
Integrated Food Security Phase Classification (IPC) system chuan June, 2026-ah chuan ei tur kham an neih loh avangin naupang kum nga hnuai lam 1,32,000 vel an thi mai thei tih an tar lang bawk.
Palestinian-te chenna ram dinhmun an thlirnaah Israeli sipaiten Gaza an beiha insaseng tura an tih pawhin tam tak chu ‘khaw hmu tha lo leh bengngawng’ an nih hlawm tawh avangin an tan insaseng ngaihna pawh a awm lo niin an sawi.
“Rualban zo tawh lo tam tak hi hmun him lo leh chenna atana tlak lohvah insaseng tura nawr luih an ni a, kalna a awm loh avangin leicharah an vahin an vak thin tih sawi a awm,” an ti bawk.
CRPD chuan inkhuahkhirhna leh Israel-in puihna luh a dan chu rualbanloten an tuar zual bik hle tih an sawi bawk.
“Rualbanlote hian puihna an hmu lo va, ei tur, tui in tur, inthiarna nei lovin an awm a, mi dangin dam khawchhuah tuma an beihna an ring ve leh chhawng thin a ni,” an ti.
US leh Israel ruahmannaa mi mal pawl, GHF-in puihna an semna hmun li a awm a, UN-in an buaipui lai khan 400 chuang a awm a. Heng hmunte hi rualbanloten an pan ve thei lo va, an pan pawhin inkahna a awm reng avangin an tan insaseng a hautak bik hle niin report-ah hian tar lan a ni.
CRPD chuan rualbanlo 83% chuan indawm kan nana an hman an hloh va, veivah nana hman thil dang, bawngtawlailir ang chi pawh an nei zo lo tih an sawi.
Israeli thuneituten puihna an thawn luhah nawrlirh, walker, cane, tiang leh taksa bung lem ang chi chu a tel ve ngai lo tih an sawi bawk.
Committee chuan Israel-in Hamas dova Gaza a beih tan, October 7, 2023 atanga kumin August 21 thleng khan hliam tuar 1,57,114 an awm tawh a, heng zinga 25% chuang chu an dam chhunga rual an ban theih loh phahna tur hliam a ni tih an sawi.