Berampuin beram no 17 a thunun!
MBBA ke a bai zui…
-- Advertisement --
Mizoram Basketball Association (MBBA) in kum 40 a tlincham (Ruby Jubilee) a lawmna darkhuang ri a reh fel awrh a, a hnuaia referee 17 zet chuan hlawh pun phuta pangchanna thawm an chhuah chu MBBA puipa lam hian chinfel sakin inngai mah se, referee lam hi an titau zui a – hun engemaw chen MBBA hnuaiah inhnamhnawih thei lovin beramno 17 hian hrem an tawk zui!
He thu hi Mizoram infiamna khawvela hriat reng ni tawh tur a ni. Mizo basketball inthenawmkhawvennaa chîk taka ngaihtuahna seng a, thalaiten an hlut em em basketball Mizo te tana a thuk zia hre pha chin leh he ‘game’ hmangaih tan chuan he thil thleng hi zualko aw ang maia hriat nuam lo a ni ngei ang!
Heng boruak inmung lai hian remna duh rawl ri karah, innghirnghona phun ri ser ser leh inhrosa kuk kuk, chapona silhfen dum nena inthuam tan, berampu leh beramno 17 inkarah hian inkhikhakna khandaih phawina remchang a awm! Amaherawhchu, hun harsa leh khirhkhanah mi fingten ngawih an chuh thin tih a ni a, hei hi berampu leh a beramno 17 te hian vawng se, lei (tounge) ven’ that hun lai a ni e!
Hello, Pu MBBA!
Mizo ril rem leh nuam tihzawng tak infiamna basketball hi kum 1984 atang khan mumal takin a hun lai mil zelin kalpui a ni a, enkawltu MBBA hian sorkar lam atanga sum a hmuh beitham zet hmanga inrelbawlin, India rama basketball league thawm na ber a duangchhuak thei hial – fakawm tak a ni.
Hemi kawnga Zonet Cable TV Pvt Ltd tha thawh hi a theuneu lo hle. Chutih rualin, hun a kal tam ta deuh a, anni lam production hi duhkhawp lohna ri a puak ring ta fu!
Pu MBBA-a nen hian thawkdun reng chi an ni em tih hi thenkhat tan chuan – ‘big fat NO’ a ni ta!
He Association ah hian khawpui thalai mai bakah AMC area pawn atangin pumrua lian leh hrawl tak tak bakah infiamna huang dangah pawh itawm tak tak an inziak lut chum chum a, Mizoram pela professional league khelhna tur kawng bo rih teh mah se, thalaite chevel hi mi thahnemngaiten vil zuiin, hlawkna pakhat mah awm lovin hloh chungin club din duh Mizo ngei mai an rawn pen chhuak tuam tuam a, sum chevel leh leng vel chu khawchhung titi (talk of the town) a tling pha ta tlat!
Hei hi vawiina Mizoram basketball khawchin chhinchhiahnaa chiang tak a lang a ni. Mahnia inkhualtelemna tur bungrua Pu MBBA-a hian a intodelh mai bakah, hmun dang atangin chah lut theitu club a nei cheu.
He state basketball pawl hi pawl nung tak, inrelbawlna kawnga indaih tawk lohna avanga ke bai a ni tih hi kut nei chuan a pawm ngam a ngai!
Inrelbawlna fawng chelhtu Pu MBBA-a hian a aia ruh rel lian leh sum mawmna zawk, State danga basketball association aiin a kalphung tur a duanna calendar-ah tih tur a inchhawp hnem a, a vil hneh ta lo va… He lai hi kan hai thet zui ang!
Khawchin chu…
Player lamin nawmna bakah hlawkna Mizoram basketball chhehvelah hian a awm tih an hre tawh a, an tangin an thawkrim ta hle! Coach te tan lah phurna tham Indian Rupee an ipte ah a luang lut mek bawk!
Hetih lai hian Pu MBBA-a leh club neitu tan tangka zawnga hlep chhiar tur a awm eih lo – mihring indaih lo hahna vek!
Association hruaitu, kan Pu MBBA-a tan hian hming?hatna kailawn erawh a ni tel. Chutih rualin, OB chin erawh ngei rawn, mi tam mil loh nihna tawktarh tura inphochhuahna a ni bik zual. Anni ho phenah hian hmathlir fel tak nei an executive committee rual kamtam lo an tam chuan OB tan hian chhawlhal changa tuikhur pan tur ban phak a hnai tihna; mahse, thu thlum tak leh ‘yes, sir’ tih chhakchhuak thei deuh reng hi thahrui ni lovin thauchhia a ni a, Pu MBBA-a hian a chhehvelah thurawn lakna tlak remna duh mihring a chhawp hnaih thiam a tul.
Beram bo 17!
MBBA referee ?ha rual, Mizoram basketball huanga inhnamhnawih thei lova hremna tawk mek fak hlawh lo val rual te hi vin leh kutzungchala kawh rawn tawk nasa, kaihhruai ngai an ni a, viltu leh vengtu mamawh an ni.
Tarlan tak angin Pu MBBA-a te lamin kum khat chhunga an chetlak dan tur an duang a, thluakin tlin mah se, mihring an indaih lo!
Tournament a awm a, an hmachhuan leh hmatheh ber chu hlawh neia a rawih referee tuna a thunun mek te hi an ni lo thei thin lo va, inelna a hmuna buaipuitu – kawngkapui hawn atanga khar thleng chu referee te kut a ni zui zat.
Tlangval rual awm khawm kumtluan ta chu an intelkhawm nghetin an ruh tial tial a, chhungkua an din der – zing dar 10 bawr atanga zan dar 10 thleng sahbawn pakhat intawm lo chauh an nihna hi anmahni enkawltu Pu MBBA-a hian a aiawha vil tura palai a dah ve thinin mawhphurhna a hlenchhuah zawh loh avang nge, beramin a pu ‘be’ khum ta te pawh ti ila, a sual lovang!
A rah chhuah duhawm lo chu!
June ni 9, 2025 a rawn inherchhuak a, beramno 17 thununna a rawn puak chhuak a – berampu leh beramno inkara buaina chu hrilhfiahtu lamin an sawi tam poh leh pawm lo tu tanfung a nghet ting!
Chinfelna lam hawiin Pu MBBA-a’n beram tar tawh a ko va, anni lam hi an lo inhawng phian; mahse, rei an tlin lovang, an tha a thumin khawvel dangah an khawsa rei tawh a, an hun a liam tawh he referee khawvelah hian. Aizawl pawn lama referee-te tan lah puarna tham lovah hian châm reng theih rual a ni lo!
Mahni hlutna beramno lam pawhin an hriat kiau a, anmahni siam liantu an phatsan hi naupang chhe thil a ni.
He hun khirhkhanah hian siamtharna siktui nen berampu leh a beramno 17 hian remna dar khawng ri dun turin dawhkan khat kil rem rih lo mah se, he chhum dum hi ni eng mawi tak lanna hmahruai a ni tih pawm chungin, chapo leh khermeina hnawlin Mizoram basketball bung thar ngaihnawm tak inherchhuah hun hi i thlir rih phawt ang u…