Bernabeu-a kirleh tur Ramos

Sergio Ramos chuan kum li hnua a vawikhatna atan Pathianni zan hian a club hlui Real Madrid hmachhawn turin Sevilla thuam nen Santiago Bernabeu a lut leh dawn a, goal a khung a nih pawhin a celebrate loh tur thu a sawi.
Kum 37 mi hian kum 16 chhung Real player a nih lai khan trophy 22 a lakpui hman a, kum 2021-ah Paris St-Germain zawmin, nikum September thla khan a naupan lai club Sevilla zawm turin Spain-ah a kirleh a, a club hlui hmachhawn turin chance a nei zui ta a ni.
Real Madrid-a a awm lai khan Ramos hian La Liga title panga bakah Champions League trophy pali a lakpui hman a; a pumpuiah Spanish giants tan khan match 671 khelin he club tana game khel hnem palina a ni pha.
Ramos chuan Pathianni zana a club hlui a hmachhawn tur chungchang sawiin, “Goal ka lo khung ta a nih chuan ka celebrate dawn lo a, mahse, kan tan chuan chakin a ken tel point thum kha a hlu a ni mai a, kan chak chuan ka lawm tawk em em ang. Madrid club pumpui leh fans hi ka la zah em em reng a ni,” a ti.
Bernabeu cheithat lai a nih avangin Real Madrid-a Ramos-a season hnuhnungberah Estadio Alfredo di Stefano an luah a, an defender ropui thlahna pawh Bernabeu lamah an hmang thei lo a, tuna Real home ground-a a kirleh tur chungchang sawiin:
“Mahni ina kirleh tur ang mai ka ni. Ka career-a hun pawimawh tam ber ka chhiarliamna hmun a ni a, a mipui, fans, mi zawng zawng, ka team-mate hlui, an zavai mai khan hriatrengna duhawm ka chanpuite vek an ni. Chutiang hmun ngei maia ka kirleh thei tur chu ka tan hun hlu bik a ni dawn a, a zauthau theih dawn khawp mai,” a ti.
Real Madrid hian point 62 hum chungin La Liga table-ah hma an hruai mek a, point 24 neitu Sevilla erawh 15-na an ni thung.