Beyonce vs Taylor Swift Grammy-ah an insu ngun

Tunlai khawvel huapa hmeichhe zaithiam lar ber pahnih Taylor Swift leh Beyonce te hi an pahnih inkar chu a tha niin a lang a, zaithiam lar ve ve ni ta chu Grammy Awards-ah pawh category khatah nomination an ni dun fo tawh a, head-to-head-ah Beyonce hian pahnihin hma a hruai a, Swift hian tum khat chan tha changin, mahse, chumi tum chuan award ngaihhlut album of the year category a ni thung.
Heng zaithiam pahnih te hi 67th annual Grammy Awards-ah pawh category pakhat aia tamah an insu leh ngeiin a rinawm a, nakkuma sem tur Grammy nomination hi kumin kum tawp lamah an puang ang. Beyonce hi ‘Cowboy Carter’ avangin album of the year nomination a lang tura rinkai nghal a ni a, Taylor Swift pawh a album thar, April ni 19-a a tlangzarh tur ‘The Tortured Poets Department’ avangin he category-ah hian a lan ngei a rinawm bawk.
Anni pahnih hi tun hnaia an album tlangzarh thar pathum te chu album of the year category-ah hian nomination an lang vek a, Beyonce hian ‘Beyonce,’ ‘Lemonade,’ leh ‘Renaissance’ te lan puiin, Swift hian ‘Folklore,’ ‘Evermore’ leh ‘Midnights’ a lanpui ve bawk. Chuvangin an album thar pawh hi he category nomination-ah hian an lanpui leh ve ve ngei a rinawm.
Beyonce hian Grammy Award chu a dawng hnem tawh zawk ngei mai a, mahse, an danglamna pakhat chuan Swift hian album of the year hi vawi li a dawng tawh a, Beyonce erawhin he category-ah hian Grammy a la dawng lo tlat.
Swift leh Beyonce te hi album of the year category nomination-ah hian tum khat an awm dun tawh a, 2010 kha niin, Swift ‘Fearless’ album in award dawngin, Bey-i ‘I Am…Sasha Fierce’ chu award dawng lo zawkah a tang tlat. Category dangah tum riat an awm dun tawh a, chung tum riat-ah chuan Beyonce-i’n award tum hnih dawngin, tum ruk dang chu an dawng lo ve ve a ni.
Beyonce-i’n award a dawn zawkna te hi 2010 Grammy kha niin, song of the yeat-ah Beyonce hian ‘Single Ladies (Put a Ring on It)’ avangin a dawng a, Taylor Swift ‘You Belong With Me’ chu a dawng lo zawkah a tang a, hemi kumah tho hian best female pop vocal performance-ah Beyonce ‘Halo’-in award dawngin, Swift ‘You Belong With Me’ chu a dawng lo zawkah a tang bawk.