Bial 23-ah zaa 80 chuang vote a tla
Mizoram MLA inthlanpui neih zawh takah polling station-a vote thlaktu chu za zelah 80.66 an ni a, Assembly bial 40 awmah bial 23-ah zaa 80 chuang vote a tla a, Aizawl district-a bial 12 awmah bial 2-ah chiah zaa 80 chunglam vote a tla.
November 7-a a nawlpuiin vote an thlak hnu ah, Aizawl South-III bial huamchhung Muallungthu Polling Station-ah November 10-a vote thlak that a nih hnu ah polling booth-a vote tla chin hi tihchian theih a ni ta a, vote nei 852088 atangin vote thlak 687334 an awm a, chu chu zaa 80.66 a ni.
Voter zingah hian kum 80 chunglam, an tana polling station pan harsa tawh anmahni chenna ina vote thlak leh pianphunga harsatna nei (Persons with Disability), anmahni chenna vote thlak (home voting) mi 2059 vel an awm nia hriat a ni a, polling official ho Facilitation Centre-a vote thlak 8526 te nen, a vaiin vote 10585 a tla nia hriat a ni a. Hei bakah hian service voter mi 4973 awmte atangi vote tla engemawzat a la awm dawn a, vote tla hrim hrim hi zaa 80.66 aiin a la sang dawn a ni.
District ang zawnga chhutin Assembly bial pathum awmna Serchhip district ah vote a tla tha ber a, a vaia belhkhawmin za zelah 84.78 a tla. Assembly bial pathum tho awmna Mamit district (84.65%) leh bial khat chauh awmna Hnahthial district (84.19%) ten an dawt. Bial hnih awmna Siaha district chu vote tlak chhiatna ber niin, zaah 77.03 a tla a, bial 12 awmna Aizawl district (77.83%) leh bial thum awmna Champhai district (79.92%) ten an dawt a, an ni district pathum hi zaa 80 vote tla an tlin lohna ho an ni nghal bawk.
Assembly bial malah Thorang chu vote tlak thatna ber a ni a, zaa 88.19 a tla. Tuikum leh West Tuipui ten dawtin zaa 87.32 ve ve a tla a ni.
Bial malah Saiha bial chu vote tlak chhiatna ber niin zaa 75.32 a tla a, Aizawl East-II bial (75.46%) leh Lawngtlai East bial (75.53%) ten an dawt a ni.
Bial tamna ber Aizawl district ah Aizawl South-III chu vote tlak thatna ber niin zaa 85.90 a tla a, Tuivawl (81.33%) in dawtin, Aizawl West-I (78.21%) in a dawt a. He district-a bial tam zawkah hian zaa 75-76 inkar a tla a ni.