Biden-an China lakah ‘cold-war’ kalpui lo ti

US President Joe Biden chuan US chuan China-in international influence neih a tum dan tumin chet a la lo tiin Vietnam nena inzawmna thar siamnaah a tarlang.
American sipai hnuhnung berin Vietnam a chhuahsanna kum 50 chuang tawhah Biden chuan Hanoi panin ram pahnih inhmelma thinte inzawmna thar siam turin inremna an siam a.
Comprehensive Strategic Partnership Vietnam nena siam chuan US nena inlaichinna nasa takin a siamtha dawn a. Washington chuan ram pahnih tena inzawmna tha an neih theih nan tun hnaiah hma a la nasa a, Aisa a China influence tihnep a tumna kal zel nia ngaih a ni bawk.
Washington leh Hanoi tena inzawmna an siam thar chu Vietnam in diplomatic lama ram dang inzawmna a neihpui sang ber niin Vietnam hi tun hma chuan China thian tha ni reng thin a ni.
Hanoi-a thusawina a neihah Biden chuan American chet lak dan chu China thlauhtlak tumna a ni lo tia sawiin a pawimawh ber zawk chu international rules dinchantir zawk a ni tiin a sawi a.
“Cold War kan ngaihtuah nasa lutuk deuh niin ka hria a. Chutiang lam a ni lo, economic growth leh stability siam tumna zawk a ni” tiin Biden chuan a sawi a.
“China hi economic takin hlawhtling se ka duh a, rules behchhanin hlawhtling ngei se ka duh a ni” tiin a sawi bawk.
Ram pahnih inlaichinna tha chuan China a tithinrim nghal hle a, America ‘cold-war mentality’ a tihsak thung a ni.
Mahse Hanoi chuan Washington nena inlaichinna neih hmain thil tam ngaihtuah lawka thutlukna a siam niin Le Hong Hiep, Singapore’s ISEAS-Yusof Ishak Institute chuan US nena inremna chu ‘chhin chhiahtlak’ tiin a sawi.
Ram pahnihte chuan sumdawnna lamah nasa zawkin an thawkho dawna ngaihna thlenin Vietnam hi hun rei tak chhung chu China-a thuk taka innghat a ni a. Vietnam hian educated workforce thahnem tak neiin chu tak chu entrepreneurship lamah US investor tena an duh tia sawi a ni bawk a.
Sumdawng lian Dell, Google, Microsoft leh Apple te chuan an supply chain tam tak Vietnam lamah an sawn tawh a. Hanoi-in Moscow thlauhthlak zel a tumnaah weapons leh military equipment siam nana hman a duh tia sawi a ni bawk.
Washington chuan Vietnam chu khawvel semiconductor supply chain pawimawhah tel ve ngei se a duh a, a electronic sector te tiphuisui se a duh bawk tih a ni a, chu chu United States-in advanced tech hmang thei lo tura China a siamna kal zel tia sawi a ni bawk.