Billboard 200-ah 21 Savage ‘American Dream’ a la No.1

21 Savage album thar ‘American Dream’ chu Billboard 200 (albums) chart-ah a No.1 a, he chart-a kar hnih a No.1-na niin, Greenday album thar ‘Saviors’ pawh top 10-ah a debut e.
Billboard 200 chart hi kar khat chhunga US-a album hralh tam dan atanga tehin chart ranking siam thin a ni a, album hralh zat teh nan hian album tak tak hralhna bakah streaming atanga album hralhna tlukpui leh album-a hla mal hralhna atanga album tlukpui te belhkhawm thin a ni.
21 Savage ‘American Dreams’ hi 78,000 hralh lehin, a kar hnih nan chart-ah a No.1 pui leh ta a, 77,000 chu streaming atanga album hralhna tlukpui (on-demand official stream maktaduai 103.16) niin, album tak tak hralh chu 1,000 a ni a, album-a hla mal hralhna chu chiar tham loh a ni ve thung.
Chart No.1 hlui Morgan Wallen ‘One Thing at a Time’ chu 63,000 hralh lehin No.3 atangin No.2-ah a insawn thar leh a, chart No.1 hlui bawk Drake ‘For All the Dogs’ chu 53,000 hralh lehin No.4 atangin No.3 a kai thar ve leh ta bawk.
Greenday album thar ‘Saviors’ chu a kar khatnaah 49,000 hralhin No.4-ah a debut a, 39,000 chu album tak tak hralhna niin, streaming atangin 9,500 (on-demand official streams maktaduai 12.25) niin, album-a hla mal hralhna atangin 500 a tling thei bawk. ‘Saviors’ hi Greenday album he chart top 10-a lang thei 12-na a ni.
Noah Kahan ‘Stick Season’ chu 48,000 hralh lehin No.6 atangin No.5 a kai thar leh a, top 10-a album lang dang zawng chu chart No.1 hlui vek niin, Taylor Swift ‘1989 (Taylor’s Version)’ chu 47,000 hralh lehin No.5 atangin No.6-ah a tawlh a, SZA ‘SOS’ chu 41,000 hralh lehin No.9 atangin No.7-ah a insawn thar leh a, Nicki Minaj ‘Pink Friday 2’ chu 39,000 hralh lehin No.7 atangin No.8-ah a tawlh a, Zach Bryan self-titled album chu 38,000 hralh lehin No.12 atangin No.9 a kai thar leh a, Taylor Swift ‘Lover’ chu 38,000 tling lo deuh hralh lehin No.10-ah bawk a la awm.