Billboard 200-ah Ken Carson ‘More Chaos’ a No.1

Billboard 200-ah Ken Carson ‘More Chaos’ a No.1
Ken Carson album thar ‘More Chaos’ chu Billboard 200 (albums) chart No.1-ah a debut a, he chart-a a album No.1 kai thei hmasa ber leh top 10-a a album lang thei hmasa ber a ni bawk. Kumin hian he chart-a a vawi khat nana No.1 kai thei pathumna a ni a, Tate McRae (So Close to What) leh PARTYNEXTDOOR (Drake nena an album intawm $ome $exy $ongs 4 U) te hnung a zui a, nikum chhung zawng khan he chart-a a vawi khat nana No.1 hi zaithiam panga an awm ve thung.
Billboard 200 chart hi kar khat chhunga US-a album hralh tam dan atanga tehin chart ranking siam thin a ni a, album hralh zat chhut nan hian album tak tak hralhna bakah streaming atanga album hralhna tlukpui leh album-a hla a mala hralhna atanga album tlukpui te belh khawm thin a ni.
‘More Chaos’ hi kar khat chhunga 59,500 hralhin, chung zinga 48,500 chu streaming atanga album tlukpui (on-demand official stream maktaduai 67.3) niin, album tak tak hralh chu 11,000 a ni a, album a hla a mala hralh chu chhiar tham a ni lo.
‘More Chaos’ hi Ken Carson album he chart-a lang thei pathumna niin, a album pathum zinga top 10-a lang thei hmasa ber a nih bakah, he chart a No.1 album hmasa ber a ni bawk.
Chart top 10-a lang dang zawng chu chart No.1 lo ni tawh vek an ni a, Kendrick Lamar ‘GNX’ chu 55,000 hralh lehin No.5 atangin No.2 a kai thar leh a, SZA ‘SOS’ chu 53,000 hralh lehin No.4 atangin No.3-ah a insawn leh a, Sabrina Carpenter ‘Short n’ Sweet’ chu 52,000 hralh lehin No.6 atangin No.4-ah a insawn a, PARTYNEXTDOOR leh Drake album intawm ‘$ome $exy $ongs 4 U’ chu 52,000 tling lo deuh hralh lehin No.3 atangin No.5-ah a tawlh ve thung.
Morgan Wallen ‘One Thing at a Time’ chu 46,000 hralh lehin No.7 atangin No.6-ah a insawn leh hret a, Playboi Carti ‘MUSIC’ chu 45,500 hralh lehin No.1 atangin No.7-ah a tawlh a, Bad Bunny ‘Debi Tirar Mas Fotos’ chu 42,000 hralh lehin No.8-ah bawk a awm leh a, Ariana Grande ‘Eternal Sunshine’ chu 40,000 hralh lehin No.2 atangin No.9-ah a tawlh a, Lady Gaga ‘MAYHEM’ chu 39,500 hralh lehin No.12 atangin No.10 a kai thar ve leh ta bawk.