Billboard 200 chart-ah Morgan Wallen ‘One Thing at a Time’-in record a siam

Morgan Wallen album ‘One Thing at a Time’ chu Billboard 200 (albums) chart-ah No.1 niin, he chart-ah hian kar 19 a No.1 tling ta a, Garth Brooks album “Rpoin’ the Wind” record lehpelin, country album zinga he chart-a No.1 ni rei thei ber record a siam.
Billboard 200 chart hi kar khat chhunga US-a album hralh tam dan atanga teha chart ranking siam thin a ni a, album hralh zat chhut nan hian album tak tak hralhna bakah streaming atanga album hralhna tlukpui leh album-a hla mal hralhna atanga album tlukpui te belhkhawm thin a ni.
‘One Thing at a Time’ hi kar khat chhungin US-a 68,000 hralh lehin, chung zinga 65,000 chu streaming atanga album tlukpui(on-demand official stream maktaduai 89.63) niin, album tak tak hralh chu 2,000 a ni a, album-a hla mal hralhna atangin album 1,000 tlukpui a tling thei bawk a, hei hi a kar 19 nan chart-ah a No.1 pui leh ta a ni.
Billboard 200 chart hi March 1956 atangin kar tin ranking tihchhuah thin a ni a, he chart-a kar 19 chin No.1 kai thei hi album 12 chiah a la awm a, chung album te chu- West Side Story, soundtrack (54), Thriller, Michael Jackson (37), Rumours, Fleetwood Mac (31), South Pacific, soundtrack (31), Calypso, Harry Belafonte (31), 21, Adele (24), Purple Rain, soundtrack, Prince and the Revolution (24), Saturday Night Fever, soundtrack (24), Please Hammer Don’t Hurt ‘Em, MC Hammer (21), The Bodyguard, Whitney Houston/soundtrack (20), Blue Hawaii, Elvis Presley/soundtrack (20) leh One Thing at a Time, Morgan Wallen (19) te an ni.
One Thing at a Time hi March ni 18, 2023 a tlangzarh kha niin, a zawnin kar 12 chhung a No.1 nghal a, chumi hnuah June thla tawp leh July thla chawhma lamah kar thum a No.1 leh a, October-ah kar khat No.1-in, kumin January leh February-ah kar khat ve ve a No.1 leh a, tunah No.1 a rawn kai leh ta a ni.
Noah Kahan ‘Stick Season’ chu 53,000 hralh lehin No.4 atangin No.2 a kai thar a, album dang chart top 10-a lang te chu chart No.1 lo ni tawh vek niin, Ye & Ty Dolla Sign ‘Vultures 1’ chu 53,000 tling lo deuh hralh lehin No.3-ah bawk a la awm a,, SZA ‘SOS’ chu 50,000 hralh lehin No.5 atangin No.4-ah a insawn leh hret a, Drake ‘For All the Dogs’ chu 42,000 hralh lein No.6 atangin No.5-ah a insawn ve leh hret bawk.
Taylor Swift ‘1989 (Taylor’s Version)’ chu 39,000 hralh lehin No.7 atangin No.6 a kai thar leh a, Swift ‘Lover’ chu 38,000 aia tam deuh hralh lehin No.9 atanin No.7-ah a insawn lehin,Zach Bryan self-tiyled album chu 38,000 hralh lehin No.12 atangin No.8 a kai thar leh a, Morgan Wallen ‘Dangerous: The Double Album’ chu 38,000 tling lo deuh hral lehin No.11 atangin No.9 a kai thar leh a, he album hi chart top 10-ah kar 138 a lang tling ta a, solo artist anga he chart top 10-a album lang rei thei ber record a siam a sawhnghet leh ta sawt a, top 10 khartu chu Travis Scott ‘Utopia’ niin, 36,000 hralh lehin No.17 atangin No.10 a kai thar ve leh ta a ni.