Billboard Annual Power 100 List-ah Taylor Swift a No.1
Billboard-in kum khat (2023) chhunga rimawi lama thiltithei leh huhang nei lian zual mi 100 a thlan chhuah zingah Taylor Swift chu No.1 a ni a, Taylor Swift hi he annual list-ah hian tum hnih a No.1-na a ni ta, artist zingah he list a vawi khat aia tam No.1 ni thei awm chhun a la ni. Chu mai a ni lo, he list a artist zinga No.1 ni thei pahnihna a ni bawk. He list-ah hian 2014 khan Jay-Z leh Beyonce te chu an nupain No.1 an ni a, anni bak hi he list-ah hian zaithiam No.1 ni thei an la awm lo a ni. Kumin list-ah pawh hian Top 40-ah artist lang thei awm chhun a ni.
Taylor Swift hi 2023 kha kum tha a tih loh theih loh a, Billboard Hot 100 (singles) chart-ah pawh tum 11 a No.1 thei a, Billboard 200 (albums) chart-ah tum 13 a No.1 a, Hot Country Songs chart-ah tum 9 leh Pop Airplay-ah tum 12 a No.1 thei bawk. Swift hi Billboard annual Women in Music event-ah pawh 2014 leh 2011 khan Woman of the Year-ah an lo puang ta a, 2019-ah phei chuan Woman of the Decade-ah an puang nghe nghe a ni.
Billboard Annual Power 100 List siam nan hian rimawi leh a kaihhnawih sumdawnna kawng hrang hrang a mi thil tithei an thlang a ni ber a, tour atanga sum lalut hnem, hla leh album stream nasat dan te, sum dawnna kawng hrang hrang an hmalak dan leh mipui lama huhang an neih len dan te chu tehna pawimawh a ni a, chutirual chuan zaithiam ten chutiang an tihtheihna phena mi pawimawh, a thluak bur chu tunge tih an zawng leh thin a ni. Dan naranin hetiang mi hi artist an ni ngai lem lo a, music executive, office lama thluak leh sum lo chalai veltu an ni thin.
Tun tumah erawh rimawi khawvela record siam thei khawpa a chetvelnaah hian Taylor Swift chu artist a nih mai piah lamah a thluak bur ber a ni tel tlat. Stadium tour hlawhtling tak a neih theihna te, Billboard 200-a No.1 ni thei album tam tak a neih theihna te, concert film siam tawh zawng zawng a sum lalut hnem ber a neih theihnaah te hian amah chu a thluak bur ber pakhat a ni tlat. Amah hian executive a inti ngai lonain, a hlawhtlinna tura kawng sialtu pawimawh ber chu amah hi a ni tlat si a ni. Team tha tak a nei a, mahse, amah hi engkima thutawp siamtu a ni.
Billboard Annual Power 100 List Top 10:
01 Taylor Swift
02 Lucian Grainge – CHAIRMAN/CEO, UNIVERSAL MUSIC GROUP
03 Rob Stringer – CHAIRMAN, SONY MUSIC GROUP; CEO, SONY MUSIC ENTERTAINMENT
04 Michael Rapino – PRESIDENT/CEO, LIVE NATION ENTERTAINMENT
05 Daniel Ek – CO-FOUNDER/CEO, SPOTIFY
06 Irving Azoff – CEO, THE AZOFF COMPANY
06 Jeffrey Azoff – CEO, FULL STOP MANAGEMENT; COO, THE AZOFF COMPANY
07 Robert Kyncl – CEO, WARNER MUSIC GROUP
08 Lyor Cohen – GLOBAL HEAD OF MUSIC, GOOGLE/YOUTUBE
09 Oliver Schusser – VP OF APPLE MUSIC, APPLE TV+, SPORTS AND BEATS APPLE
10 Jay Marciano – PRESIDENT/CEO, AEG PRESENTS; COO/OFFICE OF THE CHAIRMAN, AEG