Billboard Artist 100-ah Taylor Swift a No.1

On May 5, 2023 11 0

Taylor Swift chu kar khat chhunga US-a zaithiam lar ber niin, Billboard Artist 100 chart-ah a No.1 a, he chart-a a No.1 tawh zawng zawng belhkhawm chu kar 65 a tling ta a, he chart-a No.1 ni ngun ber a nihna a sawh nghet leh ta sauh e.
Billboard Artist 100 chart hi kar khat chhunga US-a zaithiam lar dan tehna niin, chart ranking siam nan hian album leh hla hralh tam dan te, streaming leh radio airplay te chu tehna pawimawh a ni.
Taylor Swift hian a album hralh that zar a zo a, tunkar Billboard 200 (albums) chart-ah a album 10 lai a lang thei a, chung zingah chuan ‘Folklore: The Long Pond Studio Session’ a tel. He live acoustic album hi vinyl chauha tihchhuah a ni a, copy 75,000 hralhin Billboard 200 chart-ah No.3 a kai nghal a ni. He album hi Disney+ documentary film, 2020-a an tihchhuah tawh companion album a ni.
A album dang pahnih ‘Midnights’ leh ‘Lover’ te chu chart No.4 leh No.10 an ni bawk a, ‘Folklore’ pawh No.12 niin, ‘1989’ (No.21), ‘reputation’ (No.22), ‘Red (Taylor’s Version)’ (No.27), ‘Evermore’ (No.29), ‘Fearless (Taylor’s Version)’ (No. 41) leh ‘Speak Now’ (No.66) te an lang bawk.
Taylor Swift hi tum khata Billboard 200 chart-a top 100-a album 10 chin nei thei zaithiam pahnihna niin, hetiang tithei zaithiam dang chu Prince niin, May 2016-a a thih khan a thih hnu kar khatah a album 15 te chu chart top 100-ah an lang a, Taylor Swift hi damlai ngei a hetiang tithei hmasa ber a ni bawk.
BTS member Suga chu No.3 a kai thar leh a, ani hian Agust D hmingin a album thar ‘D-Day’ a tichhuak a, he album hi copy 1,40,000 hralhin Billboard 200 chart-ah No.2 a ni a, solo artist anga he chart-a a top 10 album hmasa ber a ni a, hei hian Artist 100 chart-ah pawh a vawrh sang ta a ni.
BTS member pasarih zinga panga chu Artist 100 chart-ah hian solo artist angin top 10-ah an lang tawh a, Jimin (kar khat a No.1), Agust D (No.3), RM (No.6), J-Hope (No.9) leh Jin (No.10) te an ni. BTS hi group ang chuan Artist 100-ah hian kar 21 chhung an No.1 tling tawh thung a ni.
Billboard Artist 100 Top 10:
1 Taylor Swift
2 Morgan Wallen
3 Agust D
4 Luke Combs
5 SZA
6 The Weeknd
7 Drake
8 Peso Pluma
9 Miley Cyrus
10 Metallica