Billie Eilish te unauin Oscar record siam

Finneas leh Billie Eilish te unau chuan Oscar-ah Barbie film hla ‘What Was I Made For’ avangin Best Original Song an dawng a, an unau hian kum hnih kalta khan James Bond film hla ‘No Time to Die’ avangin he award hi an lo dawng tawh bawk a, Oscar history-ah eng category-ah pawh award pahnih dawng thei naupang ber an ni. Eilish hi kum 22 niin, Finneas hi kum 26 a ni ve thung. A hmaa he record siamtu chu Luise Rainer niin, kum 28 a nihin Oscar pahnih a dawng hman a ni.
Finneas leh Billie Eilish te hian record dang pawh an la siam a, best original song category-ah songwriter zinga award dawng nawn rang thei ber an ni a, kum thum chhungin award pahnih an dawng hman a, a hmaa hetiang record siamtu chu Tim Rice niin, ani hian kum nga chhungin award pahnih a dawng ve thung.
‘What Was I Made For?’ hla hian Grammy-ah pawh song of the year a dawng tawh kha a ni a, tun kum 26 chhunga Oscar best original song leh Grammy song of the year dawng kawp thei hmasa ber a ni a, 1998-a Titanic film hla Celine Dion sak ‘My Heart Will Go On’-in Oscar-a best original song leh Grammy song of the year a dawn kawp hnua hetiang ti leh thei hmasa ber an ni.