Bivol-a’n Beterbiev a hneh let
Pathianni zing khan Russian boxer tha pahnih Dmitry Bivol leh Artur Beterbiev ten light-heavyweight huanga kawnghren pali an inchuh a. An inhnek hmasakah tlawm zawka tang Bivol chuan phuba lain hnehna a chang a, kawnghren pali a hlawhchhuak. Riyadh a inhnek dangah palian boxer lar Joseph Parker chuan awlsam takin hnehna a chang ve bawk.
Russian boxer tha pahnih Dmitry Bivol leh Artur Beterbiev te hi October 2024 khan an lo inhnek tawh a, Beterbiev-a’n point hmangin hnehna a chang. Inhnek hmuhnawm tak an lantir hnuin inhnek nawn leh turin an inrem zui leh nghal. An inhnek nawn lehna hmun atan sum tamna Saudi Arabia khawpui Riyadh an thlang. Pathianni zing khan inhnek hmuhnawm tak an pholang nawn leh a, Bivol a chak ve ta thung.
Kum 40 mi Beterbiev-an kum 34 mi Bivol lakah bul a tan tha a, inhnek tir lamah na takin a khingpui a hnek fuh. Bul tan tha viau mah se inhek tawp lamah chau zawkah a tang thung. Hnehna chan ngei tuma tan khawh Bivol hnek na tak dawl zo lovin a tlu tep nghe nghe. Tlu em lovin round 12 a hmang tluan thei hram thung. Inhnek hmuhnawm takah hian Dmitry Bivol chuan Artur Beterbiev chuan point 114-114, 116-112 leh 115-113 in hnehna a chang hram a, light-weight huanga kawnghren ngaihhluthlawh pali; WBA, WBC, WBO leh IBF kawnghren a hlawhchhuak. Bivol lakah uiawm taka a tlawm hi Porfessional huanga Beterbiev tlawm vawi khatna a ni.
Bivol lakah uiawm taka a tlawm hnuin Beterbiev chuan, “Bivol nen inhnek nawn leh hi ka duh lova, hei hi ka duhthlan a ni lo. Mah se..buaina tur a awm lo ve, a tul a nih chuan a vawi thum nan pawh kan inhnek leh mai a niang chu”, tiin Bivol hmachhawn nawn leh tura a inpeih thu a sawi.
Pathianni zinga inhnek dangah palian boxer lar Joseph Parker chuan a khingpui Martin Bakole chu awlsam takin a hneh a, second round-ah a knockout. Parker hi IBF world champion Daniel Dubois nen kawnghren inchuh tur an ni a. An inhnek hun a hnaih hle tawh laiin Dubois chu nawmsam loh vangin a inhnukdawn a. Dubois hmunruak luahtu Bakole chu awlsam takin a hneh ta a ni. Bakole a knock-out hnuin Parker chuan palian huanga kawnghren pathum kawl khawm mektu Aleksandr Usyk hmachhawn tura tha ber leh mipui pawhin an duh ber a nih thu a sawi.