Lok Sabha inthlan turah BJP leh a thawhpuite chuan hneh takin sawrkar an siam leh dawn a, Mizorama BJP MP kan thlantlin chuan hmarchhak state atanga central minister awmchhun tur kan nei dawn tih BJP Mizoram president Vanlalhmuaka chuan a sawi.
BJP State president sawi danin, Lok Sabha-a MP 545 ah party malin 370 lak an inbeisei a, NDA-a an thawhpui party thenkhatte nen chuan 400 chuang nei thei turin an inbuatsaih mek. BJP kaihhruai Narendra Modi sawrkar chu hneh taka tlingin a sawrkar leh dawn tih a chiang a, chutah chuan Mizoramin central minister kan neih ngei theihna’n BJP official candidate a nih angin Mizoram mipuiin vote turin a sawm tih a sawi a ni.
State-a sawrkarna chelhmektu Lok Sabha MP neih kher chu kan lo kal tawh thin dan ni mah se, tunah chuan kalphung thar tih a nih tawh avangin, New Delhi-ah AAP a sawrkar laiin, an MP ah AAP pakhatmah awm lo, BJP vek an ni chu New Delhi-in a hlawkpui hle tih Vanlalhmuaka hian a sawi a. Chief minister Lalduhoma leh minister dangten central-a sawrkar hotute zuk dawr mah se, an hlawhtlin theih loh chhan chu, state chhunga inthlanah BJP inhlauhsiakna leh induh lohsiakna hmanga vote an zawn vang tih a sawi. NDA zawm duh deuh reuh, zawm thei chiah si lo, BJP kaihhruai sawrkar chakna ring tho sia tui lai rapa kal ngaihna vak hre lo an ni tih a sawi a ni.
MNF chu khulama NDA, helama NDA neitu BJP dotu an ni, tiin, BJP chu a chhung lam atanga do an tum thu hmangin vote an zawng tih a sawi a. Congress lah an manifesto ropui ber chu BJP leh Hindu sawizawm a, rem leh rem loa BJP beih a ni tih a sawi.
Kumin February-a Delhi-a BJP ho inkhawmpuiah Mizoramin BJP MP a thlantlin chuan state hmasawnna tur pek an nih dawn thu an lo tiam tih BJP Mizoram hruaitu hian a sawi a. Lok Sabha MP a nih chuan Mizoram mipui leh state sawrkar mek pawhin kawng tinrengin kan hlawkpui ber a ring tih a sawi bawk.
Zawhna chhangin Vanlalhmuaka chuan, hmarchhaka BJP thawhpui ho atangin central minister nih tuma bei mek awm nual mah se, amah chauh hi State president ding leh BJP mi ngei awmchhun a nih avangin a buk a tih rit phah tih a sawi a. Tunhnaia sawrkar laipui atanga sum sawichhuah ni awma sawirik pawh, state-a sawrkar hmasa huna central sawrkar hotuten an lo tiam tawh, NHIDCL kuta a sum hi lut tur a ni tih a sawi.
BJP MP candidate hian thlantlin a nih a, MP a nih anga a tih theih leh tih tur inchhawp a sawi a. Hriselna, zirna, retheite khaichhuahna leh loneitute tana hamthatna hrang hrang, central scheme awmsa tihpuitlin tur leh a thar hnuhchhuah turte a sawi a ni.
BJP a sawrkar leh ngei dawn MP neih chuan minister dawn – Vanlalhmuaka
Get real time updates directly on you device, subscribe now.
Prev Post
Next Post