BJP chakloh chhan ‘overconfidence’ ti

Uttar Pradesh Chief Minister Yogi Adityanath chuan kum 2024 Lok Sabha inthlan Uttar Pradesh bikah ‘overconfidence’ avangin BJP te chuan an beisei ang an nih loh phah tiin a sawi a. Mahse, kum 2027 Assembly poll ah chuan chakna an chang ngei ang tiin a sawi.
“Prime Minister Narendra Modi kaihhruaina hnuaiah Opposition te pressure pe rengin Uttar Pradesh-ah kum 2014 leh 2019 Lok Sabha poll ah leh 2017 leh 2022 Vidhan Sabha-ah te hlawhtlinna kan chang a ni. BJP te chuan kum 2024 inthlanah pawh a hmaa inthlan ang bawkin vote percentage a nei tha tho va. Mahse, vote na sawn leh overconfidence in kan beisei min phaktir ta lo a ni. Chuvang chuan Opposition inthlan hmasa lama che chhe tak tawh te an invaivung phah a ni” tiin Adityanath chuan Lucknow a Ram Manohar Lohia National Law University a Bhimrao Ambedkar Auditorium a BJP State Working Committee meeting neihnaah a sawi.
Opposition te chu Lok Sabha inthlan hmaa society caste lines hmanga thendarhah puhin Chief Minister chuan chutiang a thlen tawh loh nan party leader leh worker te chu inralringa veng reng turin a ngen bawk a. Chumai bakah social media platform chu tha zawka hman dan ngaihtuah a ngai a ti bawk.
“Opposition party leh foreigner ten min beih nan hlawhtling takin social media an hmang a. BJP worker ten social media an enfiah reng a ngai a, thuthang a awmin an bei let nghal tur a ni a, party-in Scheduled Caste (SC) leader te a zah dan te pholan thin tur a ni. Kum 2019 khan UP a alliance lian ber kan hneh a nih kha” tiin Adityanath chuan sawiin MP atanga Councillor thlengin Assembly segment 10 a by-election atan leh kum 2027 Vidhan Sabha inthlan atana inpuahchah nghal turin a ti bawk.
Lok Sabha inthlan hnua working committee hmasa berah hian BJP national president J.P. Nadda mai bakah Union leh State Ministers, MPs, MLAs, MLCs, Lok Sabha candidate leh block-level leader te an fuankhawm a ni.
Lok Sabha inthlan hnuhnung bera Uttar Pradesh a BJP performance chuan beisei a pha lo hle a, BJP tan UP chu state pawimawh chungchuang niin Parliament a majority (272) neih nan UP chu pawimawh ber a ni. BJP kaihhruai National Democratic Alliance (NDA) chuan seat 36 chauh an lakaha BJP ten seat 33 an la a, RLD ten seat hnih leh Apna Dal (Sonelala) ten seat khat an la a ni. Kum 2019 kha chuan UP atang hian seat 62 ngawt an la a, kum 2014 khan seat 71 lawih an la thung.
Nadda chuan na taka Congress te kap thungin grand old party te chuan inthlan tum thuma an MP neih belhkhawm pawhin BJP te chu a la zat pha chuang lo a ti a. “State 13-ah Congress ten seat khat pawh an laklohna a awm a. Gujarat, Madhya Pradesh, Maharashtra leh Chhattisgarh ah te Congress te leh BJP te inbeih bikna seat 64-ah Congress te chuan seat hnih chauh la in, BJP te chuan seat 62 kan la” tiin Nadda chuan a sawi.
Saffron party te chuan principle of “Sabka Saath, Sabka Vikas, Sabka Vishwas” chu thupui berah kan nei zel dawn tia sawiin BJP chakna chu workers leh leaders te thawhrimna vang a ti bawk.
Nadda chuan Congress te chu Constitution leh democratic values te namnulah puh bawkin, “Inthlanah khan Congress ten Constitution chungchang an sawi nasa hle a, anmahni zawk hi namnul ber tu an ni tih hriattir nawn an ngai. Congress te hian elected government tum 90 an tithlu tawh. Ram Temple chungchang an sawi a, BJP te chuan election issue ah kan la ve lo, rinna thil zawk a ni,” tiin a sawi bawk.