BJP-in kawng siam a that loh thin thu Union MoS an hrilh

BJP-in kawng siam a that loh
thin thu Union MoS an hrilh
BJP Mizoram chuan state sawrkar enkawl kawngpui siam a that loh thin thu leh hemi avanga mipui tawrh dan chu Mizoram tlawhtu Union minister of state for Road Transport & Highways Ajay Tamta hnenah an thlen.
Union MoS hi Raj Bhavan-ah Thawhtanni zan khan BJP State president Vanlalhmuaka chuan a kawm a. NHIDCL-in kawngpui an siam zawh tawh, siam mek leh siam belh turte chak zawk leh a hun taka thawh zawh theih dan tur a sawipui bakah Mizoram sawrkarin kawng an enkawlah sum a neih loh vang leh tha taka hna thawh a nih loh avanga mipui tawrh dan, PMGSY kawng siam a that tawk loh dan bakah kawng tha leh tlo neih theih dan tur a sawipui
Union MoS Ajay Tamta chuan Mizoram chu kawng leh infrastructure development thawh lamah an thawk uluk lo chu ngun taka ngaihtuah a ngai a. Ram leilung leh sik leh sa awm dan en chungin uluk taka kawngpui siam a ngai tih a sawi. A mawhphurtute pawhin ram rohlu an enkawl tih hria a, mahni ta anga thawk turin a chah.
Hnahthiala damdawi in sak mek leh Govt Higher Secondary School sak mek chu hna muang an tih thu leh an thawh chinah hna a tha tawk lo hle tih sawiin, state sawrkar leh bialtu MLA ten vil ngun se an duh tih an sawi a. Sum awmsa ni si, a huna hnathawh zawh theih loh leh hna chhe lutuk chu pawi a tih thu Union MoS hian a sawi a ni.
Central sum hmanga hnathawh dang pawh lo enzui tur leh a tul anga DoNER ministry leh PM Office-ah ziaka thlen turin BJP State president hi a chah.
Tunhnaia Mizorama ruahsur nasa avanga tuilian leh leimin tuarte dinhmun pawh Union MoS hi sawipuiin, sawrkar laipuiah thlensak turin a ngen.
Hetihrual hian BJP National president JP Nadda pawhin Thawhtanni zan khan BJP Mizoram president hi rawn bia in, ruahsur nasa avanga tuilian leh leimin avanga harsatna tawkte report tura a hrilh bakah state sawrkar hmalak dan lo enzui turin a chah a ni.