BJP nen kan thawkdun dawn lo – ZPM president

BJP nen kan thawkdun
dawn lo – ZPM president
BJP nen thawh dun tum anga puh an ni chu thu dik lo a ni a, thawh ho an tum lo tih ZPM president Lalliansawta chuan a sawi.
Zirtawpnia ZPM Aizawl South II Block huaihawta party hruaitu inkawmhona a hmanpuinaah Lalliansawta chuan BJP nen thawhho tum anga puhna chu thu dik lo a nih avangin an party mite lo chiai lo tura chahin, thawh ho an tum lo tih a sawi a. UCC chu an party-in an duh lo a, an theih ang angin an dodal zel dawn tih a sawi bawk.
Manipur buainaa sawrkar laipui a ngawi rei lutuk hi pawi an ti takzet tih a sawi a. A theih ang angin thawmhnaw leh thawhlawm an khawnkhawm a. Tanpuina hi an theih chin chu an ti ve tih a sawi.
Parliament-in Forest Conservation (Amendment) Bill 2023 a pass chu a theih ang angin an dodal dawn tih ZPM president hian a sawi a. “Hetiang dan an rawn siam mai hi a pawi kan ti hle a, ZPM-in kan pawm thei loa, a theih ang angin kan dodal dawn,” a ti.
ZPM chu mi hrang hrang infinkhawm – ‘six basic needs’ tuipuitute, budget-a thlai thar leina dah tuipuitute, decentralisation tuipuitute an ni a. Buai tura duhtute duhthusam a la thleng loa, lungrual taka an la kal thei chu Pathian hruaina a ni tih ZPM hruaitu hian a sawi a. “Tuna kan kal dan hi a la tha tawk a. Fimkhur takin kan kal ang,” a ti.