BJP nena min sawizawm luih hi Congress politic game – ZPM

BJP nen inzawm tum anga Congress party-in an puh ngar ngar na chu an politic game mai mai a ni a, thawhpui neih an tum lo tih ZPM party chuan an sawi nawn.
ZPM Media general secretary Eddie Zosangliana Colney chuan Congress party mangang chalchangin, thu belhchian dawl lo leh rintlak loh hmanga mipui rilru hruaikawi tumin ZPM leh BJP thawh dun tum angin an sawi thin a. An party leader leh working president te sawi fo tawh angin, party lian pathum zinga central thuhnuaia kun ve lo party awmchhun an ni tih a sawi.
“MNF chu BJP thuhnuaia kun a ni a, Congress lah an candidate tur thlenga anmahni pawha tifel thei lo, central pawmpui ngai a ni. ZPM hi tualto party, central-a zawmpui nei lo awmchhun, Mizoram pelh ngai loa mahnia thutlukna siam thei awmchhun kan ni,” a ti.
Congress-in MNF bei loa, an opposition pui an bei fo leh BJP nen an sawizawm chhan chu MLA inthlanah ZPM tha chakna hmanga MLA neih ve hram dan an ngaihtuah vang ni bera an hriat thu sawiin, “Central-ah BJP paihthlak tuma party hrang hrang infinkhawm, Indian National Developmental Inclusive Alliance (INDIA) ah Congress hi a meizang hlaptu a ni. INDIA ah hian ZPM kan tel duh an beisei laiin an beisei anga engmah a thlen tak loh avangin BJP nen min sawizawm lui ta ngar ngar a. INDIA-a tel ve tum ila, remchanga lak a, central lamah ZPM nen thawk dun anga zuk sawi a, ZPM tha chakna ringa MLA seat 2/3 lak ve theih an inbeisei a, an thangkama min awhtir an tumna politics game a ni,” ZPM GS hian a ti.
MLA inthlanah thawhpui an nei dawn loa, anmahniin an ding dawn tia an hotuten an sawilawk tawh angin, tumah thawhpui loin bial 40-a ding tur an tifel tawh tih a sawi.
2018 inthlan dawnah ZPM-in Election Commission hnenah registration a dil a, inthlan hmaa registration a hmuh hman tak loh avangin khami tuma ZPM candidate nih tum ten loh theih lohin independent candidate anga nomination an file a tul tak avanga independent-a ding a, thlantlinte pawh independent MLA ni ta an ni tih Eddie Zosangliana hian a sawi.
Anti Defection Law-in a tum tak, party behchhana in candidate-ten thlantlin an nihna party leh a thlangtu mipui phatsan a, party dang zawm a phal loh ang kha ZPM thlawptu MLA-te hi an ni lo a, an ni chu loh theih lohna avang zawka independent-a ding, a thlangtute pawh ZPM party mi leh ZPM thlawptu neutral mipui an ni, tiin, “Hetiang a ni chung hian dan hnuaiah independent MLA an nih bawk si avangin, ZPM leader Pu Lalduhoma chunga thil thleng anga an laka sual chhuah lui a, hektu an lo awm leh palh hlauha inven nan leh, anmahni leh party tan pawh a him zawk nan official taka ZPM candidate ni turin MLA 5-ten tunhnaiah banna an thehlut ta mai zawk a ni,” a ti. Hei hi Assembly speaker a nih laia Pu Lalrinliana Sailo thurawn anga, amah a ban hma ngeia ti an nih thu a sawi bawk.