BJP sawrkar thuneihna hmansual hi Danpui hmangin ka beilet ang – Lalbiakzama

On Mar 30, 2024 13 0

Centre-a BJP sawrkarin thuneihna hmangsuala hnam tlem zawk leh sakhaw tlem zawkte a hnuaichhiahna chu, MP-a thlantlin a nih a, BJP an sawrkar leh hlauh a nih pawhin India danpui tanchhanin thurualpui theih dangte nen theihtawpin beihlet a tum dawn tih Congress candidate Lalbiakzama chuan a sawi.
Lok Sabha inthlanpui atana Congress party-in Aizawla campaign an khuhhawnnaah an party candidate Lalbiakzama chuan, RSS leh an party din BJP chuan Hindu lalram din chu an tum ber a ni a, Hindu ni lo te chu second class citizen ang chauhin min chhuah mek tih a sawi.
“Forest Conservation Act hi kan tan a hlauhawm lutuk a. India Parliament hian Article 371(G) angin kan ram hi min chhuhsak theih loh laiin, BJP sawrkar chuan min chhuhsak an tum mek. Electoral bonds an hmangsual a, Income Tax department leh Enforcement Directorate hmangin company-te sum party tan an chhuh a. Press mite zalenna an rapbet a, court hial pawh an thunun vek tawh,” a ti.
MP a nih chuan environment khawih lo thei ang berin hmasawnna hna thawh a nih theih nan leh kan intodelh theih nan hma a la anga,
central lamah BJP an sawrkar hlauh a nih pawhin kan ram tana tha lo tur an dan siam leh hmalakna chu India Constitution tanchhan in nasa takin a beilet dawn tih Congress candidate hian a sawi. “Hnam tenau dang leh sakhaw tlem zawkte thurualpuiin khawvel hriatah ka puangchhuak ang. Mizoram leh India ramah hian thlamuang taka kan awm zel theih nan in vote hlu tak thlak ang che u,” a ti.
MPCC president Lal Thanzara chuan tun MP inthlan chu Mizo Kristiante tana hun pawimawh ber a ni a. Hnam tlem zawk leh sakhaw tlem zawk betute BJP sawrkar hnuaiah kan him loh em avangin Mizo mipuiin kan ngaihpawimawh a ngai tih a sawi.
“Congress party hruaitu hmasaten hnam tinin zalen taka kan sakhua kan biak theih nan India danpui hnuaiah sakhaw zalenna min siamsak a. Chu chu BJP sawrkar hian nuaibo an tum mek. Central BJP leh a thawhpuiten Kristiante min nekchep a. Parliament-a BJP thawhpui miah lo tur chu Congress party kan ni,” a ti.
Kristiante nekchep zawnga BJP-in hma a lak mek lai hian ZPM leh MNF party chuan NDA-a tel an inchuh ta emaw tih tura thuthang chu zahthlak a tih thu Lal Thanzara hian sawiin, “Kan ram, kan hnam, kan sakhua a him loh chuan hmasawnna eng ang pawh nei mah ila a him lo a nih tih kan hriat a ngai,” a ti.