Botafogo lakah PSG an tlawm
USA a khelh mek Fifa Club World Cup 2025-ah zirtawp zing lam khan inlehthalna lian a thleng a, Brazil club lian Botafogo chuan European champion PSG an hneh. Champions League champion PSG an hneh hi Botafogo in hnehna an chan len ber tum ni thei hial tura ngaih a ni. PSG an hneh vangin Botafogo hian knock-out round an hnaih nghal kuarh. PSG an tlawm lai hian Inter Miami leh Atletico Madrid nen hnehna an chang ve thung.
Botafogo 1-0 PSG
Kum 2024-ah Copa Libertadores champion Botafogo hian Champions League champion Paris Sr Germain lakah rin an kai phak lo viau. Rinkai lo zawk nimah se an khel tha viau thung a, point thum hmu zawkah an tang ta daih. Brazil club Botafogo tan hian Igor Jesus chuan minute 36-naah hmahruaina goal a thun. Team lian lakah goal thun hmasa zawk an nih vangin Brazil club an phur hle a, inrintawkna sang zawk nen an inlan chhunzawm
PSG in an si phurh sut ngei tumin tan an khawh nasa viau a, Khvicha Kvaratskhelia leh Goncalo Ramos ten goal thun theihna hun tha tak nei bawk mah se uiawm takin an hun tha neih an hlah. Ball chang tamin an khingpuite nawr viau mah se hun tawp thlengin goal an thun thei lova, mak takin an tlawm zui ta a ni.
PSG lakah an chak vangin Botafogo in knock out round an hnaih leh zual sauh. Botafogo hi vawi hnih an chak zawn ta a, point ruk hmuin hmahruaitu an ni mek. An khelh hnuhnung berah point thum hmu tawh Atletico Madrid an hmachhawn zui leh dawn a, La Liga club lian lakah hian an chak zo lo a nih pawhin tlawm an pumpelh thei a nih chuan knock-out round an lut dawn. Botafogo laka tlawm PSG hian an match hmasa berah Atletico Madrid an hneh tawh a, Group B-a point la hmu lo, Seattle Sounders an hmachhawn zui leh dawn vangin tlang theihna hun tha tak an la nei tho thung.
Group B-a inkhel dangah Atletico Madrid chuan an khingpui Seattle Sounders FC chu 3-1 in an hneh a, point an hmu ve ta nge nge. Atletico Madrid tan hian Pablo Barrios chuan goal hnih a thun a, Axel Witsel chuan goal khat a thun bawk. Sounders FC tan hian Albert Rusnák chuan goal khat a thun ve bawk.
Messi a inlar
Zirtawp zing lama inkhelah a thlengtu team an nih vanga ngaihven hlawh Inter Miami in FC Porto an lehthal a, Lionel Messi freekick goal ropui hmangin hnehna an chang.
Portugal club lian FC Porto hian Inter Miami lakah bul an tan tha viau a, inkhel tan atanga minute 8-na lekah Samu Aghehowa chuan penalty atangin hmahruaina goal a thun nghal. He goal hmang hian hma an hruai reng a, si khat faia hmahruai chungin chawlhlawk an hmang.
Chawlhlawk hnu lamah Inter Miami an khel tha viau a, goal hnih an thun thuai. Second half tan atanga minute hnihna lekah Telasco Segovia chuan goal thunin an si phurh a sut. Goal an thun vangin an phur thar viau a, goal pawh an thun belh leh thuai. Minute 54-naah player ropui Lionel Messi chuan mawi zetin free kick a chhuih goal a, hmahruai letna goal a thun. Messi goal thun hi hun tawp thlengin an venghim a, FC Porto lehthalin point thum an hmu zui ta a ni. Porto lakah an chak vangin Inter Miami hian knock out round an hnaih sawt bawk.
Group A-a inkhel dangah Brazil club lian Palmeiras chuan an khingpui Al Ahly chu 2-0 in an hneh a, group A hmahruaitu an ni zui nghal. Inkhel hmuhnawm leh inhnehtawk takah goal lut a awm thei loh reng hnuin Palmeiras an vannei a, minute 49-naah Wessam Abou Ali own goal hmangin hma an hruai a. José López chuan minute 59-naah goal thunin an chakna a nemnghet zui leh bawk.
Group A-ah hian Palmeiras leh Inter Miami ten point li ve ve an hmu a, a chung berah Palmeiras an awm. Al Ahly leh FC Porto ten point khat ve ve an hmu tawh bawk a. Tling leh tla thei vek an la ni naa Palmeiras leh Inter Miami te dinhmun a tha rih viau thung.