Box office-ah ‘Dune 2’ a No.1
Box office-ah ‘Dune 2’ a No.1
Timothee Chalamet leh Zendaya te channa ‘Dune: Part Two’ chuan Hollywood sum che vel a rawn tikâng ve leh ta deuh a, tun weekend kalta khan North America-ah cinema hall ticket hralhna atangin dollar maktaduai 81.5 lalutin box office No.1 a ni a, kumina film tlangzarh zingah opening weekend-a North America-a sum lalut hnem ber a la ni a, Chalamet channa-ah pawh opening weekend-a sum lalut hnem ber a ni bawk.
‘Dune: Part Two’ hui US pawn lamah pawh a chetha viau a, ram hrang hrang 71 atangin dollar maktaduai 97 a lalut bawk a, tihian opening weekend-a a lakluh zawng zawng chu dollar maktaduai 178.5 a tling. He film hi market lian China leh Japan-ah chuan tunkar tawpah an tlangzarh dawn chauh a ni.
‘Dune 2’ hi darkar 2 leh minute 46 a sei nin, Timothee Chalametleh Zendaya bakah Austin Butler, Florence Pugh, Christopher Walken, Rebecca Ferguson, Javuer Bardem, Josh Brolin, Stellan Skarsgard, Dave Bautista leh Charlotte Rampling te pawh an inlan.
Dune film hmasa zawk, 2021-a an tlangzarh khan khawvel huapin dollar maktaduai 402 a lalut thi a, COVID-19-in khawvel a tihbuai lai kha a ni a, hetiang boruak karah pawh dollar maktaduai 400 a lalut tling thei a, ‘Dune 2’ hi chu hei aia sum lalut tam tura beisei a ni.
Bob Marley: One Love-in a weekend vawi hnihnaah dollar maktaduai 7.4 lalut lehin No.1 atangin No.2-ah a tawlh a, he biopic hian ni 10 chungin US-ah dollar maktaduai 82.8 a lalut tling tawh a, US pawnah dollar maktaduai 63.3 lalut tawh bawkin, a vaiin dollar maktaduai 146.1 a lalut tling tawh.
Sakhaw rinna lam nena inkaihhnawih film, Ordinary Angels-in dollar maktaduai 3.8 lalut lehin No.3 a la ni a, he film hian ni 10 chhungin US-ah dollar maktaduai 12.6 a lalut tling tawh. Superhero movie beisei pha ta lo ‘Madame Web’-in dollar maktaduai 2 lalut lehin No.4 a ni a, he film hian US-ah dollar maktaduai 44 a lalut tling ve ta bawk.
Box office top 10:
1 Dune: Part Two $81,500,000
2 Bob Marley: One Love $7,430,000
3 Ordinary Angels $3,850,000
4 Madame Web $3,200,000
5 The Chosen: Season 4 Episodes 7-8 $3,154,905
6 Migration $2,500,000
7 Demon Slayer: Kimetsu no Yaiba—To the Hashira $2,065,000
8 Wonka $1,735,000
9 Argylle $1,400,000
10 The Beekeeper $1,114,519