Box office-ah ‘Godzilla x Kong’ a la No.1

Box office-ah ‘Godzilla x Kong’ a la No.1
Godzilla x Kong: The New Empire chuan tun weekend kalta khan North America-ah cinema hall ticket hralhna atangin dollar maktaduai 31.7 lalut lehin North American box office No.1 a ni. Hetihrual hian Dev Patel film direct hmasa ber ‘Monkey Man’ leh ‘The First Omen’ ten beisei an pha lo hle thung a ni.
Godzilla x Kong hian ni 10 chhungin US-ah dollar maktaduai 135 lalut tawhin, US pawn atangin dollar maktaduai 59.3 lalut lehin, US pawna a lakluh zawng zawng chu dollar maktaduai 226 a tling tawh a, tihian a vaiin dollar maktaduai 361.1 a lalut tling ta a ni.
Dev Patel film siam hmasa ber ‘Monkey Man’-in dollar maktaduai10.1 lalutin No.2 a ni. He film hi John Wick series leh Hanuman thawnthu entawn deuha siam a nia, Patel hi director a nih bakah a chang nghal a, mipa pakhat a nu thattu te hriat chhuah tuma gorilla hmaikawr vuah chunga zan lama fight club-a tel thin chanchin vel tarlan a ni. He film hian US pawnah ram hrang hrang 27 atangin dollar maktaduai 2.6 a lalut thei bawk.
1976 film ‘The Omen’ chhunzawmna ‘The First Omen’-in dollar maktaduai 8.3 lalutin No.4 a ni. He film hi Nell Tiger Free channa niin, American hmeichhe pakhat Rome a Catholic kohhran rawngbawltu ni tura kalin a sakhaw rinna thlenga rinhlelh tir hial thei khawp thil a tawn vel tarlan a ni.
Kung Fu Panda 4-in dollar maktaduai 7.8 lalut lehin No.5 a la ni a, he animated film hian US-ah dollar maktaduai 16.1 a lalut tling ta a, US pawna a lakluh nen chuan dollar maktaduai 400 a tlin ta bawk.
Box office top 10 te chu:
1 Godzilla x Kong: The New Empire $31,700,000
2 Monkey Man $10,150,000
3 Ghostbusters: Frozen Empire $9,000,000
4 The First Omen $8,363,000
5 Kung Fu Panda 4 $7,850,000
6 Dune: Part Two $7,200,000
7 Someone Like You $3,002,382
8 Arthur the King $1,540,000
9 Immaculate $1,405,000
10 Late Night with the Devil $1,114,000