Box office-ah ‘How to Train Your Dragon’ a No.1

Box office-ah ‘How to Train Your Dragon’ a No.1
Live-action (mihring/ ran/ ramsa tak tak leh animated/cartoon chan hona) movie ‘How to Train Your Dragon’ film an siam nawn leh chu North American box office No.1 a ni. North American box office ranking hi kar tawp (Zirtawpni – Patianni) a US-a cinema hall ticket hralhna sum chevel atanga chhuta siam thin a ni.
‘How to Train Your Dragon hian opening weekend-ah dollar maktaduai 83.7 a la lut thei a, hei hi box office-ah a No.1 pui ta a ni. He film hian US pawnlam, ram hrang hrang 81 atangin dollar maktaduai 114.1 a la lut thei bawka, tihian opening weekend-a khawvel huapa a lak luh chu dollar maktaduai 197.8 a tling nghal a ni.
He film franchise-a hnuhma lo nei tawh Dean DeBlois chu director ni lehin, he film hi 2010-a an lo tihchhuah tawh, Viking mipa naupang Hiccup (Mason Thames)-a’n a pa (Gerard Butler) thurawn pawm lo a, mi tihkhai tak Night Fury dragon, Toothless nen an inthian that dan vel tarlana a ni. He film siam nan hian (marketing tel lovin) dollar maktaduai 150 vel zet an seng a ni.
2019 khan ‘How to Train Your Dragon: Hidden World’ an lo tichhuak tawh bawk a, tun tum ‘How to Train Your Dragon’ hi a franchise-a opening weekend a sum la lut hnem ber a la ni.
Film tlangzarh thar ‘Meterialists’-in dollar maktaduai 12 la lutin, No.3 a ni a, he romantic drama hi Celine Song direct niin, Dakota Johnson, Chris Evans leh Perdo Pascal te channa a ni a, amah Celine pawh a inlan ve nghal a, New York mite kawppui tur zawn saktu (matchmaker) pakhatin a client le mi hausa tak a suihzawm kara amah pawh hmangaihna lipuia a zuan luh tel ve tak si dan vel tarlanna a ni.
John Wick behchhana film siam, Ana de Armas channa ‘ From the World of John Wick: Ballerina’-in a kar hnihnaah dollar maktaduai 9.4 la lutin, ticket hralhna hi kar opening weekend nena khaikhinin 62%-in a tlahniam nghal a, ni10 chhungin US-ah dollar maktaduai 41.8 chiah a la lut thei. He film ian US pawnah dollar maktaduai 49.7 a la lut tawh bawk a, tihian a vaiin dollar maktaduai 91.5 a la lut ta. Mahse, a film siam nan hian marketing tel loin dollar maktaduai 90 an seng a, chuvangin a dinhmun hi a la tha vak lo.
Box office top 10:
1 How to Train Your Dragon $83,700,000
2 Lilo & Stitch $15,500,000
3 Materialists $12,000,424
4 Mission: Impossible—The Final Reckoning $10,300,000
5 From the World of John Wick: Ballerina $9,400,000
6 Karate Kid: Legends $5,000,000
7 Final Destination: Bloodlines $3,900,000
8 The Phoenician Scheme $3,050,000
9 The Life of Chuck $2,144,250
10 Sinners $1,470,000