Box office-ah Kung Fu Panda a No.1

Animated film, chhungkaw kima en theih chi ‘Kung Fu Panda 4’ chuan tun weekend kalta khan North America-ah cinema hall ticket hralhna atangin dollar maktaduai 58.3 lalutin, North American box office No.1 a ni.
‘Kung Fu Panda 4’ hi a film pathumna an tlangzarh atanga kum 10 dawn hnuah an tichhuak leh chauh a, beisei aiin a che tha a, Kung Fu Panda film tlangzarh tawh zingah opening weekend-a sum lalut tam ber dawttu a la ni. Kung Fu Panda film zinga opening weekend-a sum lalut tam ber chu a film hmasa ber, 2008-a an tlangzarh kha niin, opening weekend-ah dollar maktaduai 62 a lalut thei a ni.
He film tharah hian Jack Black pawhin Po tan a aw a thawh leh a, ani bakah hian Dustin Hoffman pawhin Kung Fu master Shifu tan a aw thawh lehin, James Hong, Bryan Cranston leh Ian McShane te pawhin an aw an thawh leh bawk a, Viola Davis leh Ke Huy Quan te an tel thar bawk. He film hi Mike Mitchell direct niin, ani hi Trolls leh Shrek Forever After te pawh lo direct tawh a ni.
Dune: Part Two pawh a la che tha thawkhat a, dollar maktaduai 46 lalut lehin box office No.1 atangin No.2-ah a tawlh a, he film hian ni 10 chhungin US-ah dollar maktaduai 110 lalut theiin, US pawna a lakluh nen chuan dollar maktaduai 376.5 a tlin der tawh a ni.
Horror film tlangzarh thar Imaginary-in dollar maktaduai 10 lalutin No.3 a ni. He film hi hmeichhe pakhat (DeWanda Wise), an naupan laia an chenna ina kir leh ta, a fahrawn naupang ber (Pyper Braun) leh a savawm lemin inzawmna mak tak an neihdan vel tarlanna a ni.
Box office top 10:
1 Kung Fu Panda 4 $58,300,000
2 Dune: Part Two $46,000,000
3 Imaginary $10,000,000
4 Cabrini $7,565,038
5 Bob Marley: One Love $4,060,000
6 Ordinary Angels $2,030,000
7 Madame Web $1,125,000
8 Migration $1,100,000
9 YOLO $840,000
10 Wonka $600,000