Box office-ah ‘Now You See Me 3’ a No.1
Box office-ah ‘Now You See Me 3’ a No.1
“Now You See Me: Now You Don’t” film chuan tun weekend kalta khan US-ah cinema hall ticket hralhna atangin dollar maktaduai 21.3 la lutin, box office No.1 a ni a, hetihrual hian sum sen tamna ‘The Running Man’ chu No.2-ah a debut nain, beisei a pha lo hle.
Box offixe ranking hi US-a kartawp (Zirtawpni – Pathianni) a cinema hall ticket hralhna sum chevel atanga tehin siam thin a ni a, Ruben Fleischer direct, Now You See Me 3 hian opening weekend-ah dollar maktaduai 21.3 la lutin, No.1 a ni a, US pawn, ram hrang hrang 64 atangin dollar maktaduai 54.2 a la lut bawk a, tihian a vaiin dollar maktaduai 75.5-in bul a tan thei ta a ni.
Now You See Mee franchise-a film pathumna niin, ticket leitu zingah hmeichhe lam an tam zawk a (54%), magician thil ruk thiam rualte an rawn che leh ta a, he film-ah hian Jesse Eisenberg, Woody Harrelson, Dave Franco leh Isla Fisher te chuan an role ngai theuh rawn chang lehin, an character ‘Four Horsemen’ an rawn phochhuak leh ta a, megician naupang deuh zawk pathumin an pawl an zawm thar a, Justice Smith, Ariana Greenblatt leh Dominic Sessa te an ni.
Edgar Wright film siam, Glen Powell channa, ‘Running Man’-in opening weekend-ah dollar maktaduai 17 la lutin, No.2-ah a ni a, Powell hi film hlawhtling tak tak ‘Twisters’, ‘Anubody But You’ leh ‘Top Gun: Maverick’-ah te pawh a lo chang tawh a, mahse, tun tum chu a hlawhtling ta vak tlat lo. He film-ah hian Hollywood milar tak tak Josh Brolin, William H. Macy, Lee Pace leh Emilia Jones te pawh an chang.
A film hi Stephen King-a 1982 novel behchhana chan a ni a, 1987 khan Running Man hi an lo siam tawh bawk a, chutah chuan Arnold Schwarzenegger a chang ve thung. He film-ah hian sum lama harsatna tawkte tawktarhin, reality show hlauhawm tak an buatsaih a, chuta tel ve pa pakhat chanchin vel tarlan a ni.
Running Man hi marketing tel lo pawhin dollar maktaduai 110 senna a ni a, US pawn, ram hrang hrang 58 atangin dollar maktaduai 11.2 a la lut bawk a, tihian opening weekend-a a lak luh zawng zawng maktaduai 28.2 chiah a ni a, a siam nan an sum sen enin, a beitham tlat.
Box office No.1 pawh lo ni tawh ‘Predator Badlanss’-in dollar maktaduai 13 la lut lehin No.3 a la ni a, he alien film hian kar thum chhungin US-ah maktaduai 66.3 la lut tawhin, US pawna a lakluh nen chuan maktaduai 136.3 a tlin ve tawh bawk.
Regretting You pawh a la kaltluang viau a, dollar maktaduai 5 la lut lehin No.4 a la ni a, he film hian kar li chhungin US-ah maktaduai 45 a la lut tling ve ta a, Black Phone 2 pawhin maktaduai 2.65 la lut lehin No.5 a la ni a, kar nga chhungin US-ah maktaduai 75 a la lut tling tawh a, US pawn nen chuan dollar maktaduai 127.7 a la lut ve ta bawk.
Film tlangzarh thar ‘Keeper’-in opening weekend-ah maktaduai 2.5 la lutin No.6 a ni a, he film hi dollar maktaduai 6 (marketing te loin) chauh senga siam niin, a che chhe hran lo.
Box office top 10:
1 Now You See Me: Now You Don’t $21,300,000
2 The Running Man $17,000,000
3 Predator: Badlands $13,000,000
4 Regretting You $5,000,000
5 Black Phone 2 $2,650,000
6 Keeper $2,500,000
7 Nuremberg $2,435,000
8 Sarah’s Oil $2,341,034
9 Bugonia $1,600,000
10 Chainsaw Man — The Movie: Reze Arc $1,600,000