Box office-ah ‘Sinners’ a No.1
Ryan Coogler-a supernatural vampire film, Michael B. Jordan channa ‘Sinners’ chuan tun weekend kalta cinema hall ticket hralhna atangin US-ah dollar maktaduai 45.6 la lutin, North American box office No.1 a ni. ‘Sinners’ hian US pawnah dollar maktaduai 15.4 la lut bawkin, khawvel huapa opening weekend-a a lak luh dollar maktaduai 61 a ni.
Sinners hi 1932 kum anga chan niin, Michael B. Jordan hian dual role a chang a, phir entrepreneurs Smoke leh Stack lemah a chang a. Khawvel Indopui Pakhatna tuar chhuakin, indopui zawh hnuah sumdawnna an tan a, an hlawk khawp mai a, mahse, an beisei loh lamah thil hlauhawm tak an tawn tak dan vel tarlanna a ni.
Sinners film siam nan hian dollar maktaduai 90 (marketing tel loin) vel an seng a, opening weekend-ah box office No.1 ni mah se a sum lak luh hi duhthusam chu a la ni lo deuh. Chutihrualin che chhia ti a sawi tur chu a ni chuang lo.
‘A Minecraft Movie’-in a weekend vawi thumnaah dollar maktaduai 41.3 la lut lehin, No.1 atangin No.2-ah a tawlh a, he film hian kar thum chhungin US-ah dollar maktaduai 344.6 la lut tawhin, US pawnah dollar maktaduai 376.2 a la lut tawh bawk a, tihian khawvel huapin dollar maktaduai 720.8 a la lut tling ta a, kumina film tlangzarh cinema hall ticket hralhna atanga dollar tluklehdingawn la lut thei hmasa ber ni turin an chhut.
Easter-theme The King of Kings-in dollar maktaduai 17.27 la lut lehin, No.3 a ni a, he film hian kar hnih chhungin dollar maktaduai 45.3 a la lut tling ta. He film hi Isua khawvela a awm lai chanchin behchhana chan a ni.
Rami Malek channa, spy film The Amateur-in dollar maktaduai 7.2 la lut lehin No.4 a la ni a, kar hnih chhungin US-ah dollar maktaduai 27.3 la lut tawhin, US pawna dollar maktaduai 37 a la lut tawh nen chuan dollar maktaduai 64.3 a tlin ve tawh bawk.
US Navy Seal drama ‘Warfare’-in dollar maktaduai 4.85 la lut lehin No.5 a ni a, he film hian kar hnih chhungin US-ah dollar maktaduai 17.1 a la lut ta. He film hi Iraq indo behchhan a chan a ni.
Box office top 10:
1 Sinners $45,600,000
2 A Minecraft Movie $41,300,000
3 The King of Kings $17,273,869
4 The Amateur $7,200,000
5 Warfare $4,855,636
6 Drop $3,350,000
7 COLORFUL STAGE! The Movie: A Miku Who Can’t Sing $2,767,704
8 Pride & Prejudice $2,700,000
9 The Chosen: Last Supper — Part 3 $1,686,489
10 Disney’s Snow White $1,172,000
Box office-ah ‘Sinners’ a No.1
Get real time updates directly on you device, subscribe now.