Brazil ropuina hloh tawh lakletsak tiamtu Ancelotti
Brazil coach thar Carlo Ancelotti chu Brazilian Football Confederation president Samir Xaud kaihhruaina hnuaiah Thawhtanni khan official-in an phochhuak ta a; Brazilian Football Confederation (CBF) head-quarters-a press a hmachhawn vawikhatnaah Italian tactician ropui hian Brazil national team chu an ropuina puan haktir leh turin a tungding leh dawn tih a sawi!
2026 World Cup chu world champion vawi ruk ni thei awmchhun Brazil-in a ropui thinna a neihletlehna khan hmasaber a nih tur thu Real Madrid chhuahsan ta Ancelotti hian sawiin, nakkum world cup khel tur zawnna lama a hruai tur squad hmasaber pawh puanzar nghal a ni.
Carlo Ancelotti hian thla thar June thla World Cup qualifiers-a Ecuador leh Paraguay an tum hunah a team thar tana a match hmasa pahnih a nghakchhuak dawn a; team parukin direct qualification an hmuh theihna tur South American World Cup qualifiers-a talbuai mek Brazil harsatna a sutkiansak thei dawn em kan thlir ang.
CBF headquarters-a press conference a hmachhawn tumin Italian kum 65 mi chuan, “Khawvela team tha ber ka enkawl thei tur hi ka tan chawimawina a ni a, induh pawh ka induh phah larh a, ka hmaa hnathawh tur hi a hraw hreih hrawih hle a ni.
“He chona thar ropui zet hian min tilawmin, min tiphur takzet a; chutih laiin he team nen hian inzawmna special tak kan lo nei tawh thin. Brazil hi champion thin team-a hruaikir leh turin hna kan thawk ang,” a ti.
Brazilian fans hmaa phochhuah a nih tum hian Ancelotti hi Brazil coach hlui Luiz Felipe Scolari, chuan a lo ‘welcome’ ngat nghe nghe a ni.
Kumin March thla tawp khan Brazil hi an ram thenawm leh an hmelma lian Argentina chuan 4-1 tehrengin an sawp a, South American World Cup qualifying table lamah pawh palina an luah phah chauh tawh a, hei hi an dinhmun a nih tak avangin CBF chuan an head coach chhawr lai Dorival Junior lakah rinna an nghat zui ngam ta lo a, coach tawnhriat ngah tawh Ancelotti lam an hawi zui ta a ni.
Brazil hi tunhnai kum hnih liamta chhung khan an chefuh hlei thei tlat lo a, 2022 World Cup quarter-final match pakhatah Croatia chuan penalty shoot-out hmangin an pet tla a; kha mi hnu khan an game hnuhnung vawi 14-ah vawi nga ngawt an tlawm a, tah chuan goal 16 lai an chhuah tling nghe nghe!
South American giants ropuina pekletleh tumtu Ancelotti chuan a team thar tana a game hmasa pahnih chu an pawimawh dawn tih sawi chungin, “Player hman theih nghal tur squad-a sengluh hram hram kan tum a, hnehna chang turin kan inbuatsaih chhoh mek a ni,” tiin a laka Brazilian mipui beiseina mei si chu chhemalh ngei a tum thu a sawi.
“He ram mite hian hna tha tak thawka World Cup-a champion leh turin min duh a; tunhma lama hna ka lo thawh tawh enin he trophy hlu bik hi ka hoa lak theih an beisei tlat a, chutih rual chuan team an thlawpna ka beiseilet ve thung dawn a, a chhan pawh national team-in support a hlawh that hi a pawimawh em em a ni,” tiin Brazil mipuite chu an ram team talbuai mek elsen zui tawh loa thlawp tlat turin a chah zui nghal.
-- Advertisement --
Brazil squad thar
Goalkeepers: Alisson, Bento, Hugo Souza.
Defenders: Alex Sandro, Alexsandro, Lucas Beraldo, Carlos Augusto, Danilo, Leo Ortiz, Vanderson, Wesley, Marquinhos.
Midfielders: Andreas Pereira, Andrey Santos, Bruno Guimaraes, Casemiro, Ederson, Gerson.
Forwards: Antony, Estevao, Gabriel Martinelli, Matheus Cunha, Raphinha, Richarlison, Vinicius Jr.