Brighton in £122.8m an hlep

Brighton chuan 2022-23 season khan tui let hnu lama an club in a tawn san ber tum an tawng a. Season an hman that ber tum hian £122.8m zet hlep an nei tih an puangzar.
2022-23 season-ah khan Roberto de Zerbi kaihruaina hnuaiah an tawn ngai loh ram an tawng a, Brighton hi Premier League-ah parukna an ni phak a, Europa League khel turin an tling. EPL-ah parukna an nih bakah hian FA Cup semi-final an thleng bawk. Mual chhunga an chet that vangin sum leh pai lamah an hlawk phah thur thur a, club dangin sum an hloh duai duai laiin an ni chuan £122.8m zet hlep an nei.
Brighton hi an khelh that vangin club lian zawkin an player an duh thar a, an player pawimawh an hralh nual. An player pawimawh pali; Mali midfielder Yves Bissouma, Spain left-back Marc Cucurella, Belgium forward Leandro Trossard leh Argentina midfielder Alexis Mac Allister te hralhna atangin £121.4m zet an la lut a. Chelsea in an manager Graham Potter an lak vangin zangnadawmna £23m zet an dawng tling bawk. Tuna an sum hlepah hian kum kal taa Ecuador midfielder Moises Caicedo leh Spain keeper Robert Sanchez te hralhna chhut tel a la ni lo. Caidedo manah Chelsea in £100m an pe tawh a, £15m pek belh thei dinhmunah an ding mek bawk. Chelsea hnenah vek hian an si nghak Sanchez chu £25m in an hralh bawk.
EPL thuneituten sum leh pai inkhuahkhirna dan an siam a, an dan siamah an khirh viau bawk. Khuahkhirhna khirhkhan tak karah club tam takin sum an ch^n duai duai a. Phal chin aia an hloh tam vangin Everton leh Nottingham Forrest ten hrem an tawk tawh nghe nghe a, an ni bakah hian Aston Villa (£120m), Chelsea (£90m), Leicester (£90m), Newcastle United (£73m) leh Wolves (£67m) ten sum an hloh viau bawk.