Budget Session-ah thil mak

Assembly House-ah budget session an nei mek a, thil mak tak tak sawi tur a awm; TV lama lo entute an nui fo a, social media lamah pawh a darh fo.
Minister pakhatin bill a pu lut a, minister dang pakhatin a lo hnial! Hei hi February ni 22-a thil thleng kha a ni a, sorkar bill chungchangah minister pahnih ngaihdan inang lo hian mak tih a hlawh hle, social media lamah pawh nuihzatthlak ti an awm.
“Kha bill kha sorkar bill a ni a, chief minister a paltlang hnua House-a lut a ni a. Chumi chu sorkar lamin an lo hnial a nih chuan sorkar rin tawk lohna emaw tih theih tur khawp a ni,” minister hlui pakhat chuan a ti.
Thu dawn danin, hemi ni hian session an tin hnuah ZPM Legislature Party an inkokhawm nghal a, na takin thil awmzia an inhrilh a ni.
Zawhna leh chhanna hunah minister pakhatin ama department chan chungchanga zawhna chhang turin finance minister a sawm mauh bawk! “… kan finance minister hian a sawi fiah thiam zawkin ka ring a…” a ti a, “Ka lawm e,” tiin, finance minister kutah a dah daih! Hei pawh hi social media lamah a darh.
“Khatiang kha House kalphung a ni lo a, a vawi khat thlenna a ni ang. Inchhanpui chu a tul thei a, chutiang ni lo, a changtuin a chhang tura mi dang a sawm daih kha chu, a mak a ni mai lo a, a ngaithatthlak loh,” legislator hlui pakhat chuan a ti.
House leader-in speaker a kam khat bawk a, zawhna leh chhanna hunah zawh belhna pahnih lak belh ni se tia an thu dah chu zawm lovin speaker-in pahnih aia tam, vawi khat phei chu pakua emaw lai a la. House leader-in hemi chungchangah hian, zawh belhna pahnih lak ni se tiin speaker hovin thu an lo dah tawh tih a sawi a, chu chu zawm turin speaker a hrilh.
Minister pakhatin “dan a tam poh leh bawhchhiat tur hi a tam a” tia a sawi leh tui hna chungchang a sawite pawh social media lamah a darh.