Mahmuaka Chhakchhuak
-- Advertisement --
February 19 atanga March 13, 2024 thleng awhin 9th Legislative Assembly of Mizoram Budget Session hmasa ber chu neih a niin harsatna lian leh buaina hran awm loa tluang taka neih zawh a ni. He Session hi tum dang zawng aiin ngaihven a hlawhin a hriat a, a chhan pawh Zoram People’s Movement (ZPM) Party-in sorkarna an chan hnua Budget Session neih hmasak berna tur a niin inti fing deuhte chuan ‘ZPM sorkar hi an Budget pharh atangin an bul tan dan tur kan hre dawn alawm’ an tih hun a nih ve bawk a, a vengva chin chauh pawh niloin mipui nawlpui tan pawh thil nghahhlelhawm tak a ni bawk awm e.
A ni hmasa berah Larsap Hari Babu Kambhamphati chuan thusawiin, Mizoramah hian sum leh paia indaihlohna a nasa hle a, intodelhna turin hmasawnna ruhrel pawimawh tak tak dinte, Agriculture leh Industry-a hmasawnna nasa zawk thlen te, thalaite thiamthil tihhmasawn kawngahte, an tan mahni kutkawiha eizawnna leh sports lama hmasawnna kawng zau zawk hawnsakte chu sorkar hmathlir a nih thu a sawi a. Larsap thusawi hi a hrana sawi tham takmeuh a ni a, tuna kan dinhmun leh kan hmalam hun atana inbuatsaihna chi hrang hrangte pawh a sawi a, kan tana thil thar nia langte pawh sawiin; Thingtlang mite sum thawhchhuah tipung tura Rural Tourism lam uar kan tum dawn thute, sum lakluhna huang zauh a tul thute, hmasawnna hnathawhte reng reng a hun taka zawh a nih theihna atana uluk taka enfiah a ngaih thute, Entrepreneurship leh self-employment lam dah pawimawh a nih dawn thute, Mizo hnam nihphung, nundan leh khawsak phungte humhalh leh vawrh lar ngaih pawimawh a nih dawn thute leh thil hrang hrang a sawite hi ngaihtuahzui tham a ni takmeuh mai.
A ni hnihnaah hian Vanapa Hall-ah Larsap hoa State Day lawmna hun hman a niin chumi hnuah Lammualah Chief Minister hoa sual ngaihdam dila tawngtai beihpui neih leh a niin he hunah hian Speaker leh Minister-te leh MLAtte pawh an kal tha hle. Lammuala CM, Pu Lalduhoma thusawi hi a inbuatsaihna a tha nge a sawi thiam ve hrim hrim ni ang tih ngaihtuah tham a ni. Thusawi thiam a nih hi chu sawi hran leh ngai lo a ni nain he huna a thusawi hi chu a khawilaiah mah sawi sual a nei loin ngaihnawm leh beng fah tak takin a sawi tluan parh thei a, Politician tawngkam anga sawi a nih rualin kohhran Upa tawngkam a nih lohna engmah thliarhran hleihtheih si lohin a sawi thiam a, tawngkam uchuak leh midang tana huat tur awm miah siloin dik tak takin thil a sawiin kan tun dinhmun a sawite kha ngaihtuah zui tham a ni takmeuh. A thusawi pakhat – Tuna kan Budget pass turah hian lei kan lo bat tawh rulhna tur, a interest nen cheng Vbc. 1,095 kan dah dawn a, chu chu kumin chhunga kan pek ngei ngei ngai tur a ni a. Kan budget hi Vbc. 10,000 awrh a ni a, chuta tanga Vbc. 1,000 chuang leiba rulhna tura a kal ral tur hi a uiawm lutuk. Chutiang dinhmuna din chuan tawng huai pawh a har a tih kha ngaihthlak a hrehawm nain a dik chiah bawk si a!
Tun Session a hmuhnawm deuh pakhat chu kan Speaker kha niin a tawngkam leh a chevel khan mit a lak bik mai bakah a thusawi kha ngaihthlak a hahdam viau mai a. Speaker baka hmuhnawm dang pakhat leh chu Session laia hmeichhe pathum chevel kha niin an chhuanawm hlawm hle. Speaker dinglamah Pi Lalrinpuii (Cabinet Minister) leh Beryl Vanneihsangi (MLA) an thu a, veilamah Pravo Chakma (MLA) thu bawkin an tawngkam ngaihthlak a nuam a, an bial mipui tan thlamuanna tham an tling takmeuh hlawm. Hmeichhiate hi hmun dang leh tum dangah chuan tlema dimdawi deuh an ni thin tak nain anni hmeichhe pathumte hi chu dimdawi an ngai lo viauin a hriat a, an tuang pawh a chhah tlang hmel hlawm viau bawk. A bik takin Pi Lalrinpuii phei chu Opposition lam atanga chhaih buai tum ang deuhin zawh belhna pawh an zawt tam bik deuh em ni tih tur a nih laiin felfai takin a chhang thei zel mai a, a department enkawl tana sum leh pai mamawh zat tur a pharh danah pawh mipa tam tak tluk loh hial tur a ni thei awm e. Tunhnai lawka Zonet Cable-in a buatsaih Budget Session thlirletna hunah khan Panel-ah chanchinbu mi pahnih leh Speaker kalchhuak ta, Pu Lalrinliana Sailo an thu a, zalen takin an sawiin kan Speaker chungchang ngei pawh an sawi riin an duhkhawp loh dante leh an beisei dante chiang takin an sawi a, a ngaihnawm hle mai. Zonet Studio lama an sawi dan kha chu sawizui ka tum lem lo a, amah kan Speaker ka lo hmuh ve dan tawitea han sawi rik duh ka nei a.
Kan Assembly Speaker hi Politics lama hriat hlawh thin a ni ngai lem lo a, kum 2003 Election-ah khan ZNP ticket in Tlungvel bial a nih lai khan candidate a ni a. Chumi hnuah 2013 khan Tuichang bialah ZNP ticket bawkin a ding leh a, heng tum hnihah hian hlawhtling zoloin a hlawhchham ve ve a. A vawi thumna atan kum 2023 General Election-ah khan Chalfilh bial atangin hlawhtlinnna a chang ta hlauh a, a awmna Party chuan sorkarna siamin Assembly Speaker atan ruat a ni ta a. Heng tum thum candidate a nihnaah hian tlawmngai tura nawrhchhuah a ni zel a, kum 2003-ah kha chuan tlema hun nei deuhin a campaign a, kum 2013 leh kum 2023-ah phei kha chuan campaign-na hun a nei tlem hle. A campaign-naah leh vawiin thleng pawh hian midang tana ngeiawm leh huat tur tawngkam a neih hi hria an awm kherin a rinawm loh. Mi nun zawi leh midang venthawnna nei lian tak mi a nih vang hian Assembly House-ah ngei pawh hmuh tlin lohna neih len pawh a awl phah viau awm e. Tun Session neih zawh takah ngei pawh khan a vei lama thu leh a ding lama thute inkarah boruak a vawng daih viau bawkin a hriat.
A mizia hrim hrimah a nelawm nge a zuamawm kan tih zawk dawn, Speaker a nih a, Assembly House chhunga a kaihhruai hmasak ber atang khan opposition lam atangin amah duhkhawp lohna an rawn sawi ri viau mai a, a engahmah hma hauh atanga a mimal chungchang khatiang taka sawina awm ta kha hriatthiam a har reng hle mai a. An hmu tling lo viau em ni tih theih hial tur a ni a, inthlahrung mi leh zakzum mi tan phei chuan mahni insitna neih len a awl phah duh viau pawhin a rinawm. Amaherawhchu politician an ni a, chung zawng zawng pawh chu an tawn tur tih erawh tumahin an haiin a rinawm chuang loh a, kan Speaker pawh a tuang a chhah viauin a hriat a, House chhungah ngei pawh opposition tana ngaihbel theih turin tawngkam a neih pawh hriat tur a awm lem loin opposition lama thute kha a duhsak mah mah zawkin a hriat.
Dan leh dun lam erawh ka hre hauh lo nain kan speaker khan member pakhat tan zawhna bituk chin nei lo ang maiin a thente kha chuan zawh belhna thahnemtham tak an nei a nih kha. House member-te tana zalen taka zawhna leh zawh belhna hun pawh zau taka a hawng kha tun hma lama Assembly Speaker tih ngai loh tak pawh a ni awm e. |um dangah chuan member-te mimal inbei chiam leh pawn lama in umzui tih sawi thawmte pawh kan hre tawh thin a, tun tumah erawh chutiang a thleng lo kha Speaker boruak vawn thiam vang a nih loh chuan a chhan dang puh tur a vang viau awm e. House kaihhruai danah a hriam tawk lo tih pawh a thlirtute chuan kan hre vekin a rinawm a, a dik chiah a ni. Hriam hrek hrawk nisela tute emaw tan chuan sawizui tur a tam duh ngeiin a rinawm a, nimahsela kohhran bela chhumhmin tih hriat taka zawldawh taka hun a hmang kha a vei lama thute tan pawh ngaimawh tur a tlem deuh niin a lang.
India Vice President Shri Jagdeep Dhankhar lo kal ni khan kan Speaker ngei khan ziak en miah loa thu a sawite kha a chhuanawm hle mai a, tunhma lamah VVIP rawn kal nikhuain Speaker-te’n fimkhur tak leh chhiar sual palh hlau takin ziaksa an chhiar fo thin a, kan Speaker hi chuan Sap tawng pawh a thiam tawk hle tih a hriat a, amah a inring tawk hle tih a chiang a ni. First Timer tana House kaihhruai chu thil namai a ni hauh lo ang tih chu a chiang reng a, kan Speaker ngei pawh hi kan beiseina a sang lutuk nge duhkhawp lo lek lek anga ngaihbel tur tawngkam awm hi chu ala hun rih lo deuh e, lo thlir zel phawt ila a tha zawk lawng maw le?