Buh eichhetu pangang puang

Buh eichhetu pangang puang
Tunhnaiah Khawzawl district khaw thenkhatah buh eichhetu pangnang a puang a, Agriculture department chuan tih reh tumin hma a la nghal.
Thudawn danin Khawzawl district-a khaw pathum – Vangtlang, Chalrang leh New Chalrang khaw ho loah buh eichhetu ‘Hnahkhawr Pangang’ hmuh a ni a, District Agriculture Office atangin agriculture mithiamten an loah kalchilhin an enfiah a, a tih reh dan tur an sawipui nghal.
Chalrang leh New Chalrang hian lo atan ram hmun khat an theh a, chhungkaw 210 loah Hnahkhawr Pangang hi hmuh tur awmin, heng zinga chhungkaw 70 loah a puang nasa zual. Vangtlangah hian chhungkaw 80 loah Hnahkhawr Pangang hi hmuh tur a awm a, chhungkaw 10 loah a nasa zual a ni.
Agriculture mithiamte hian loneitute hnenah damdawi semin damdawi hman dan an zirtir nghal a. Heng khua khawtlang hruaitute chuan an harsatna tawh hria a, Agriculture department-in hma an laksak nghal chu lawmawm an tih thu an sawi a, Hnahkhawr Pangang-in buh a ei chhiat tur pawh nasa takin a ven hman an beisei tih an sawi a ni.