Buh leh thlai thar tamna tura tanho theih dan tur ngaihtuah

Buh leh thlai thar tamna tura tanho theih dan tur ngaihtuah
Mizoram-a agriculture leh horticulture hmalaknaa ‘irrigation support’ pek a nih theih dan chungchangah Inter-Departmental Coordination chu Thawhlehni khan Irrigation & Water Resources secretary Lalrothanga kaihhruaiin an thukhawm a. Agriculture & Farmers’ Welfare secretary, Horticulture secretary, MIRSAC chief scientific officer leh department pathum atangin officer pawimawh an tel. Secretary level-a hetianga inrawnkhawmna hi Mizoramah a vawi khatna nia hriat a ni.
Agriculture & Farmers’ Welfare department leh Horticulture department chuan cluster -based development leh crop planning lamah hma an sawn mek tih sawi a ni a. He hmalakna tihchakna atan hian irrigation support mumal tak neih a tul zia sawiho a ni. Loneitute chawikan a, ramin hma a sawn zual zel theihnan department thawhho leh tanho a tulzia sawi a ni.
Thutkhawmah hian Agriculture leh Horticulture department hmalak tawhna hmuna irrigation mamawhna, irrigation facility siam tawh nena tanghoa thlai mamawh tawk tui pek theih dan leh hmasawnna kawng dang sawiho a ni. Micro- irrigation, lift irrigation, solar irrigation, spring-based system leh water-use efficiency tihhmasawn dan pawh sawiho a ni.
GIS hmanga spatial planning leh scientific mapping kalpui theihnan Mizoram Remote Sensing Applications Centre (MIRSAC) puihna hman theih dan ngaihtuah a ni a. Buh leh bal, thlai thar kawngah mumal zawka department-te thawhhona in rah duhawm a chhuah zel beisei a ni.