Cambodia Oppn leader Lung Inah

Cambodia-a opposition leader langsar ber chu phatsantu tia puh niin kum 27 hrem tura tih a ni.
Kem Sokha, Cambodian National Rescue Party leader ni thin tuna thiah tak chu inthlanah chuh thei lo tura siam a ni zui a.
Foreign power te nena tangruala Prime Minister Hun Sen sorkar paihthlak tuma puh a ni.
Hun Sen hi khawvela autocrat leader ni rei ber tawh niin kum 1985 atang khan thuneihna a la chang ta char char a ni.
Cambodia hian July thlaah inthlanpui a hmachhawn dawn a. Hun Sen hian a chuh leh ngei rin a nih laiin chutihrual chuan a fapa upa ber Hun Manet hnenah thuneihna hlanchhawn a tum tawh tia sawi a ni bawk.
Kum 69-a upa Kem Sokha hi kum 2017 khan kum 2013 a video pahata US pro-democracy group te thlawpna a nei tih a sawi avangin man hmasak ber a lo ni tawh a.
Amah leh a lawyer te chuan amah an puhna chu behchhan thutling awm lo tiin an sawi thung a. US ambassador to Cambodia W Patrick Murphy pawhin thubuai siamsak a nihna chu dik lo taka thiltih tiin a sawi.
Kem Sokha lawyer Ang Udom chuan a legal team te chuan court thulukna chu an khin let tur thu a sawi a. human rights group leh Western sorkar te chuan Cambodia sorkar thutlukna chu sawiselin politics thila kailut tiin an sawisel bawk.
“A tir phat atangin Kem Sokha chungchang hi Prime Minister Hun Sen an Cambodia major opposition leader hmehmih tum leh democratic system nuaibo a tumna kawnga politics zawnga a hmalakna a ni,” tiin Phil Robertson, deputy Asia director, Human Rights Watch chuan a sawi a.
“Lung Ina Kem Sokha dah hian a political party a tichhia mai ni dawn lovin July thlaa inthlanpui felfai tak neih tumna te chu a tikhawbaw nghal vek a ni,” tiin a sawi.
Court thutlukna hian mak tih a hlawh lo sa, a chhan ber pawh Cambodian court te chu Hun Sen thunun veka awmsa nia ngaih vang a ni a.
Kem Sokha hi human rights advocate ni thin niin Cambodian National Rescue Party kaihruai thin a ni a. He party hi a thang chak hle a, Hun Sen leh a party te nawr chhuak thei tur khawpa chak an ni hman a ni.
Mahse, kum 2018 inthlanpui neih hmain an party chu khapsak an ni a, an hruaitu langsarte chu lung ina khung emaw ram danga tlanchhe lo thei lova siamin an awm vek hlawm.
Thla kalta khan Hun Sen chuan an rama independent media outlet awm chhun ni tawh Voice of Democracy pawh a fapa beiin leh a sorkar tihhmingchhiat tum tiin a tihtawpsak bawk.