Camping atanga tlanchhuak tam vangin khawtlang inveng

Camping atanga tlanchhuak
tam vangin khawtlang inveng
Tunhnaiah Synod Revival Camping Centre Neihbawiah ruihhlo ngaite tan camping neih a ni thin a, camping atanga tlanchhuak an awm deuh reng avangin Sihphir chhehvel khawtlangah thil bo sawi tur a awm thin a, an inven phah hle tih sawi a ni.
Kumin May 5 atanga June 5 chhung khan sawrkar, kohhran leh tlawmngai pawl hmalakna in Chhanchhuahna Camping neih a ni a, hemi tum hian a tirah mi sang chuang an lut a, camper an tam em avang hian Youth Recreation Centre Falkland-ah a then dah an ni. A kar lakah tlanchhuak an awm reng a, Synod Revival Camping Centre-ah hian a tawp thleng chu mi 120 vel an ni a, YRC-ah hian mi 100 chuang hretin a tawp an thleng bawk.
Mizoram Social Welfare department bultumin, kohhran leh tlawmngai pawl nen tanghoin Synod Revival Camping Centre Neihbawiah bawk hian Hulhliap Short Stay Centre kalpui leh a ni a, ruihhlo ngaite simna tur ruahmanna fel tak duan a ni. Batch khatnaah hian mi 150 chuang hret an ni a, engemawzat an tlanchhuak leh tawh nia thu dawn a ni.
Camping hmasa leh tun tuma camping-ah pawh a tawp hmaa tlanchhuak an tam avang hian Sihphir leh a chhehvelah heng tlanchhuakte chetna ni ngeia ngaih theihin thil bo a awm fo a, an inven phah nasa thin hle tih thudawnna chuan a sawi a ni.
“Scooty bo, thawmhnaw bo tih vel sawi a awm zauh zauh reng a, thlam rawk a tam a, zan lam thlenga blanket leh thildang rawn zuar kan tawng fo mai,” The Aizawl Post thudawnna chuan a ti a. Pakhat chuan chhun lamah pawh in nghak indah loa chhuah an duh loa, a hmaa huana an luhsan mai ang kha tunah chuan innghak an indah zel a, a hmaa an tih ngai lem loh two wheeler steering lock loha kalsan mai mai ang pawh an ngam ta meuh lo tih a sawi bawk.