Canada in China sang tur dodal zel nan AUKUS zawm ve tumin hma la

Canada chuan Indo-Pacific region a China lian zel dodal tura US, Britian leh Asutralia te tanrualna AUKUS zawm tumin a inpuahchah mek tiin Canadian Defence Minister Bill Blair chuan a sawi.
Canada chuan AUKUS second pillar zawm a duh thu sawi tawhin military technology thar ber ber artificial intelligence leh quantum computing kalpuinaah te telve a duhthu a sawi tawh a, mahse, kimchangin engmah sawilan a la nei lo thung.
AUKUS tih hi Australia, United Kingdom, United States military alliance sawina a ni.
“Project-specific basis a platform kan sawm ve theihna leh sawihona pawimawhah keimahni mai bakah Japan te telve theihna tur te sawihona neih a ni tawh” tiin Blair chuan Tokyo a Japanese defence minister Minoru Kihara nena inkawmna an neih hnuah a sawi a.
“AUKUS tena an thu leh hla kan nghak ang a, mahse, thil lawmawm lam a nih ka beisei sanghle a ni” tiin Blair chuan a sawi bawk.
Blair chuan Kihara nen chuan AUKUS chungchang an sawi dun thu sawiin Japan chuan zawm tumna a neih lawksa tawh thu a sawi a. AUKUS hi a tirah chuan Australia in submarine technology a neih ve theih nana din a ni ber a.
Blair hian defence minister a nih hnua Japan a tlawh hma hian South Korea tlawh hmasa in chutah pawh chuan AUKUS chungchang bawk an sawi tho a ni.
Canada chuan Asia security thilah thukzawka inrawlhna neih duhin a bik takin Japan leh South Korea nena inzawmna thukzawk neih a duh bawk a. Canada chuan tun hnaiah defence lama a sumsen a tipung nasa hle bawk a.
“Nakumah chuan ka defence budget chu kumin aiin 27% in a pung ang a, tun hnai kum thum kum li velah chuan kan defence lama sumsen chu a let thumin a pung ang” tiin Blair chuan a sawi bawk.
Kihara nena chuan thla kaltaa Japanese territory chhung Chinese sipai tena an luh chungchang an sawi dun thu a sawi bawk a. Thla thara Italy a Group of Seven defence minister meeting neihnaah pawh Chinese military activity chungchang an sawiho dawn tiin a sawi bawk.