Canada mite India-ah him lo
Canada sorkar chuan a hnathawk mi pawimawh 41-te India ram atangin zirtawpni khan a kokir a, hemi hnu hian Canada mi India rama la awmte chu intihthaih leh inrikrapna laka fimkhur tura chahin India ramah Canada khua leh tui duhlohna leh dodalna a awm mai theih thu thuchhuah a siam a ni. Canada sorkar chuan zin mite thurawn a peknaah Bengaluru, Chandigarh leh Mumbai hmuna Canada Consulate General te chu engemaw ti chhung atan engmah thawk thei lo tura khar a nih thu a sawi a, Canada khua leh tui India-a awm mek te chuan New Delhi-a High Commission of Canada atangin tanpuina leh thu thar inhriattir zung zungna an dawn reng tur thu a sawi bawk a ni.
India leh Canada sorkar inkara inhriatthiam lohna lo awm hi Khalistan mi Hardeep Singh Nijjar thihna avanga lo awm a ni a. Nijjar hi India chuan hel anga a ngaih niin June 18, 2023 khan Canada-a British Columbia hmuna Surrey hmun a pan lai mekin Guru Nanak Sikh Gurdwara car park-na hmunah thah a ni a. Hardeep Singh Nijjar hi thah a nih hma hian Canada sorkar hian a chungah action engmah la lo va, a sezawl chhuah mai mai thei hi India chu Canada sorkar lakah a lawm lo hle a.
Hetih lai erawh chuan Canadian Prime Minister Justin Trudeau chuan September ni 18 khan ‘Hardeep Singh Nijjar thah a nih thu ah hian Indian agents-te nen inthlun zawmna awihawm leh rintlak tak a awm a ni’ tiin a sawi.
Canada PM-in he thu a sawi hnu lawk atang hian India chuan Canada mite hnena Visas a pek thin chu tiam chin awm loin a titawp ta rih a ni. Canada Foreign affairs minister Melanie Joly chuan NewDelhi chuan thutawp siamin Canada aiawh palaite chu Canada-a haw vek turin thuchhuah a siam a, Zirtawpni hnu lama India rama Canada palaite an la awm zel chuan ram pahnih inlaichinna a chhiat vek theih thu thuchhuah a siam avangin India rama consulates te pawh hun engemaw chhung atan chawlh tir an nih thu a sawi a ni.
Canada mi India-a awmte himna ngaihtuahtu lam chuan India leh Canada inkara thil thleng mek te a thlir reng a, media leh social media kal tlangin Canada mite duhlohna leh a ni lo zawnga infuihna thu thehdarh a nih mek thu te sawi lan a ni. Canada mite duh loh entirna huaihawt reng theih niin Canada mite chuan vauna leh tihthaihna an dawn reng theih thu Joly chuan a sawi bawk.
“New Delhi-ah chuan mi hnuaihnung leh vangtlang anga awm tur niin mahni mimal nihna chiang taka lan theihna te midang hrilh loh tur tih te leh hmun lun laiah leh public transport-ah te kal loh tur tih leh “I zinnaah thian thate nen kal tur a nih thu leh kalna turte thiante leh chhungte chiang taka hrilh tur” tih te hi India rama Canada mite thu inchah pawimawh tak a nih thu sawi a ni bawk.