Candidate aiawhte leh media-te hriat tur hrilh

MLA inthlanpuia Champhai district-a Assembly constituency pathuma vote tla chhiar tura inpuahchahna kalzelah Nilaini khan political party counting agent-te, candidate agent-te leh media-te tan an hriat tur tul inhrilh a ni a. RO-te leh official dangte bakah MJA Champhai District member-te leh politicial party aiawh counting agent-te an tel.
District election officer James Lalrinchhana chuan vote chhiar chu inthlan kalpuinaa a hmawr bawkna leh inthlan hlawhtlinna lan chhuahna a nih angin political party aiawhte leh media-te chu an mawhphurhna leh chanvo chiang taka an hriat a tul tih a sawi a. Champhai district-a Assembly constituency pathuma vote tla chhiar turin inpuahchahna uluk leh felfai taka kalpui a ni, tiin, Election Commission-in tih tur leh tih loh tur a bitukte fimkhur taka zawm tur leh Counting Centre pawh a hun taka thleng kim turin a ngen.
Ruahman lawk dan chuan, MLA inthlanpuia Champhai district-a Assembly Constituency pathuma vote tla hi December 3 zing dar 8.00 atangin DC office Keifangtlanga Counting Hall pathumah chhiar a ni dawn a. Bial tin tan counting hall hran theuh ruahman niin, counting hall tinah hian vote tlate chhiarna tur dawhkan 8 theuh a awm dawn a. Polling station hrang hranga vote tlate chu polling station number indawt dan zelin a tahtawla chhiar tura ruahman a ni.
CCN Champhai Cable Network leh LCN Zokhawpui chuan inthlan result hi live-a tih chhuah an tum a ni.