Khawvela hmarcha thak ber ni a sawi Carolina Reaper hmarcha hi an thak na-laileng khawp a, dan naranin heng hmarcha te hi hmarcha thak zawng tehna Scoville Heat Unit-ah pawh maktaduai 1.64 a tling. A thak dan hi kan hriatthiam theih nan hmarchapui kan tih ho hi Scoville Heat Unit 2,500 atanga 8,000 te an ni.
Carolina Reaper hmarcha hi a ching/siam chhuaktu Ed Currie phei chuan a’n sawi uar khawp a, “Tlangkang atanga chirh sa rawn irh chhuak ei ang mai a ni,” a ti hial a ni.
Mitam zawk hi chuan Carolina Reaper pum khat hi kan ei zo thei dawn lo nasa mai a, chutih laiin speed eater Mike Jack hi chuan a’n leh biah biah khawp a, Carolina Reaper hmarchhe pum 50 chu minute 6 leh second 49.2 chhungin a ei zo vek hman a, Carolina Reaper pum 50 ei zo rang thei ber record a siam a, a la duhtawk mai lo, record a siam tawh hnuah pum 35 dang ei belh lehin, a vaiin pum 85 a ei ta a ni!
Kum 20 chuang hmarcha thak ngam tura lo intuaihriam tawh a ni a, Mike chuan, “A pakhatna kha a harsa ber. A rawn thak chhuak chiah kha chu pui tak a ni. A pum hnihna kha chu a ziaawm hretin ka hria, Mahse, chumi hnuah chuan a pum tin mai kha a thak telh telh tawh ni maiin ka hria,” a ti.
Mike chuan a ka chhung thak aiin a pum na chu tawrh hrehawm a tih zawk thu sawiin, “Ka pum chu na tak a ni mai. A kawchhung hi mi tuin emaw a duhtawka rawn zena, a duh dan dana tham kual vel hi a ang ka ti ber,” a ti bawk.
Mike chuan Carolina Reaper hmarcha ei avanga pum na hian darkar 14 te pawh a awh thei ni a sawiin, “Mahse, kei kha chu ka ei zawh hnu lawkah ka luak chhuak leh deuh vek a, a ziaawm ta deuhin ka hria. Ka chau hle a, thui tak kea tlan vak ang mai ka ni,” a ti.
Mike hi vegan (vegetarian ai pawha duh fir zawk an ni a, sa leh a kaihhnawih lam chi reng reng an ei lo, bawnghnute leh artui thlengin) a nih avangin a hmarcha ei avanga kawchhung thak tih daih nan bawnghnute a in lo a, bawnghnute ang deuha hman chi thildang pawh a in chuang lo. Mahse, tui a in a, tui in hian a tithak lehzual niin a sawi a, mahse, a kawchhunga hmarcha thak leh acid tih dal nan tui chu a in lui niin a sawi a, a luak zawh hnuah chaw a ei theuh bawk a ni.
Carolina Reaper pum 50 eiin record siam
Get real time updates directly on you device, subscribe now.
Next Post