CAU Imphal-a zirlaite tan MSU leh larsap-in hma la

Central Agriculture University Imphal-a Mizo zirlaite tan an tana him zawka an zirna chhunzawm zel dan turah Mizo Students’ Union ngenna angin Mizoram larsap chuan ruahmanna a siamsak.
MSU Gen. Hqrs. hruaitute hian Thawhtanni khan larsap Dr Hari Babu Kambhampati hi Raj Bhavan-ah hmu in, tunlai Manipur-a buaina avangin CAU Imphal-a zirlaite tan Imphal-a zir chhunzawm a him loh thu leh an zirna a bahlah loh nan zirlai 28 chu state dang institution-a transfer tura hma laksak turin an thlen. Manipur-a Mizo zirlaite chu an him zawkna’n state dang zirna ina transfer hian hun a duh rei theih avangin August-a admission ti tur leh exam hmachhawn turte tan online hmanga tih a nih theihna’n hma lakpui turin an ngen bawk.
CAU Imphal-ah hian Mizoram atangin zirlai 39 an awm mek a. Zirlai 39 zinga 12 chu final year leh zir zo tawh tur an nih laiin, 28 chu August 2 ralhmain admission documents (hard copies) CAU Imphal-ah thehlut tura tih an ni a. Exam hmachhawn nghal tur an ni.
Mizoram larsap hianCAU Imphal vice chancellor Dr Anupam Mishra chu telephone-a be nghalin, August 2-ah Aizawla MSU hruaitute leh zirlaite nen hmaichhana indawr theihna tur a ruahman sak a ni.